ტელეკომპანია ფორმულას დამფუძნებელი დავით კეზერაშვილი მის მიმართ უზენაესი სასამართლოს გამამტყუნებელ განაჩენს ეხმაურება და მას "სამარცხვინო" გადაწყვეტილებას უწოდებს, რომლის "უშუალო ინიციატორი და ორგანიზატორი ივანიშვილის ხელის ბიჭი ირაკლი ღარიბაშვილია".
დავით კეზერაშვილი, ასევე აცხადებს, რომ ამ საქმის მიზანია მისი და მის მიერ მხარდაჭერილი ტელევიზიის დაშანტაჟება.
"უზენაესი სასამართლოს მიერ მიღებულ სამარცხვინო გადაწყვეტილებას აუცილებლად გავასაჩივრებ სტრასბურგის სასამართლოში. თადუმაძე და ივანიშვილის ჯიბის სასამართლო მხოლოდ იმისთვის არსებობს, რომ ყველაფერი იკადროს - მათსავე სასამართლოს ორ ინსტანციაში ჩემი უდანაშაულობის უტყუარი მტკიცებულებებით გამართლებისა და თითქმის ოთხწლიანი პაუზის შემდეგ, საქმე ამგვარად შემოატრიალოს.
ჩემთვის ცნობილია, რომ უშუალო ინიციატორი და ორგანიზატორი ამ უმსგავსობისა ივანიშვილის ხელის ბიჭი ირაკლი ღარიბაშვილია. სწორედ ის ფიქრობს, რომ ამდაგვარად დააშინებს, ან დამაშანტაჟებს მე, ან ჩემს მიერ მხარდაჭერილ ტელევიზიას.
ეს კიდევ ერთხელ მარწმუნებს, რომ ისტორიის სწორ მხარეს ვარ და მიმყარებს მოტივაციას, უფრო მეტი ენთუზიაზმით დავეხმარო თავისუფალ სიტყვას და ზოგადად თავისუფლებისთვის ბრძოლას საქართველოში", - წერს დავით კეზერაშვილი.
მისივე თქმით, უზენაესის მიერ გამოტანილი განაჩენი სასამართლო სისტემის საკუთარ ვიწრო პოლიტიკურ ამოცანებზე მორგებისკენ გადადგმული ნაბიჯია:
"ივანიშვილის პირადი იურისტისა და ყოფილი გენერალური პროკურორის ხელით, უზენაეს სასამართლოში მიღებული გადაწყვეტილება, კიდევ ერთი ნაბიჯია მისი მხრიდან, სასამართლო სისტემის საკუთარ ვიწრო პოლიტიკურ ამოცანებზე მორგებისა. მე ჩემი ქვეყნის მიმართ განსაკუთრებული სიყვარული და პასუხისმგებლობის გრძნობა გამაჩნია.
სწორედ ეს პასუხისმგებლობა წარმოადგენდა და წარმოადგენს მთავარ მოტივს, წლების განმავლობაში, საქართველოში თავისუფლებისთვის ბრძოლის ნებისმიერი გამოვლინების აქტიური გულშემატკივარი და თანამდგომი ვყოფილიყავი - იქნებოდა ეს სამოქალაქო აქტივიზმი თუ ხელისუფლების გავლენებისგან თავისუფალი, დასავლურ ფასეულობებზე დაფუძნებული მედიასაშუალების მხარდაჭერა".
საქართველოს უზენაესმა სასამართლომ ტელეკომპანია "ფორმულას" მფლობელს დავით კეზერაშვილს 5-წლიანი პატიმრობა მიუსაჯა. მოსამართლემ თავდაპირველად დავით კეზერაშვილს 10 წელი მიუსაჯა, შემდეგ კი ეს სასჯელი ამნისტიით გაუნახევრდა.
დავით კეზერაშვილის წინააღმდეგ საქმე 6 წლის წინ აღიძრა. პროკურატურამ თავდაცვის ყოფილ მინისტრს ბრალი ერთ-ერთ საწვრთნელ პროექტში 5 მილიონ 60 ათასი ევროს გაფლანგვაში დასდო, თუმცა ბრალი ვერ დაუმტკიცა და ბოლო გამამართლებელი განაჩენი თბილისის სააპელაციო სასამართლომ 2017 წელს გამოაცხადა. საქმეზე სასამართლო წარმოება რამდენიმე დღის წინ განახლდა.
