დღევანდელი აქცია სამოქალაქო დაპირისპირების საფრთხეს შეიცავს, აცხადებს საქართველოს პრემიერ-მინისტრი. ირაკლი ღარიბაშვილის განმარტებით, მოსახლეობის უმრავლესობისთვის, აღნიშნული აქციის ჩატარება არის მიუღებელი. "შესაბამისად, მე მიმაჩნია, რომ აღნიშნული აქცია არ უნდა ჩატარდეს რუსთაველის გამზირზე".
მისივე თქმით, შინაგან საქმეთა სამინისტრო არის მუდმივ კონტაქტზე „პრაიდის“ ორგანიზატორებთან.
„მათ განემარტათ, რომ მათ მიერ დაანონსებული აქცია შეიცავს გარკვეულ საფრთხეს. შესაბამისად, მათ მიეცათ ალტერნატიული ლოკაციების შერჩევის შესაძლებლობა. მინდა, მივმართო მათ, რომ გაითვალისწინონ ჩვენი მოწოდება. კერძოდ, პოლიციის მიერ შეფასებული რისკები, საფრთხეების შეფასება მიიღონ მხედველობაში და ალტერნატივად, სხვა ლოკაცია აირჩიონ. ვფიქრობ, ასეთი ტიპის აქციები და ღონისძიებები ხელს უწყობს ამ უმცირესობების წარმომადგენლების დისკრიმინაციას. როდესაც ზედმეტად ხდება აპელირება და ხაზგასმა მათ განსხვავებულობაზე, მიმაჩნია, რომ სწორედ ესაა ამ ადამიანების დისკრიმინაცია. რა თქმა უნდა, ჩვენს მოსახლეობას არავისთან არ აქვს პრობლემა, არც - ამ ადამიანებთან. ყოველდღეს, ეს ადამიანები, უმცირესობების წარმომადგენლები, მუშაობენ და ცხოვრობენ აბსოლუტურად ნორმალურ ვითარებასა და რეჟიმში“, - განაცხადა ირაკლი ღარიბაშვილმა.
