შეერთებული შტატების ელჩი რუსეთში ჯონ სალივანი მოსკოვში დაბრუნდა.
სალივანის განცხადებით, რომელიც მოსკოვში აშშ-ის საელჩოს პრესსპიკერმა გაავრცელა, იგი მზად არის იმუშაოს აშშ-ის დიპლომატიური მისიის გუნდთან ერთად, საგარეო პოლიტიკის პრიორიტეტებთან დაკავშრებული პროგრესის მისაღწევად, რაც არის შეერთებულ შტატებსა და რუსეთს შორის სტაბილური და პროგნოზირებადი ურთიერთობების დამყარება.
ჯონ სალივანი შეერთებულ შტატებში აპრილის ბოლოს გაემგზავრა, მას შემდეგ, რაც რუსეთის საგარეო საქმეთა სამინისტრომ, ამერიკის მიერ რუსეთის წინააღმდეგ დაწესებული სანქციებისა და დიპლომატების გაძევების გამო, ელჩს სამშობლოში დაბრუნება ურჩია.
16 ივნისს, შეერთებული შტატებისა და რუსეთის პრეზიდენტების ჟენევაში გამართული სამიტის შემდეგ ცნობილი გახდა, რომ ორი ქვეყნის ლიდერი შეთანხმდა ელჩების ორმხრივ დაბრუნებაზე.
გასულ კვირას ცნობილი გახდა, რომ რუსეთის ელჩი შეერთებულ შტატებში ანატოლი ანტონოვი ვაშინგტონში დაბრუნდა.
რუსეთის საგარეო საქმეთა სამინისტრომ შეერთებულ შტატებში რუსეთის ელჩი ანატოლი ანტონოვი მოსკოვში 17 მარტს გაიწვია.
მოსკოვის ამ გადაწყვეტილებას წინ უსწრებდა აშშ-ის პრეზიდენტ ჯო ბაიდენის ინტერვიუ ტელეკომპანია ABC News-სთან, სადაც მან განაცხადა, რომ რუსეთს აშშ-ის საპრეზიდენტო არჩევნებში ჩარევის გამო საფასურის გადახდა მოუწევს.
ამავე ინტერვიუში, ჟურნალისტის მიერ დასმულ შეკითხვაზე, ფიქრობს თუ არა, რომ პუტინი მკვლელია, ბაიდენმა დადებითად უპასუხა.
