ჩვენ ვერთიანდებით სიმართლისთვის და მოქმედებისთვის, - აცხადებს პოლიტიკური გაერთიანება "საქართველოსთვის" ლიდერი გიორგი გახარია.
მისი განმარტებით, სიმართლე და ქმედება, ქმედება და სიმართლე – ეს იქნება პოლიტიკური გაერთიანების „საქართველოსთვის“ ძირითადი ლოზუნგი.
"ყველანი შევთანხმდებით, რომ საქართველოში არასოდეს არ გვქონია კარგი იდეების დეფიციტი ან კარგ იდეებზე პრობლემა. შეიძლება, ვთქვათ, რომ არ არსებობს დაპირება, რომელიც ჩვენს ქვეყანაში ჯერ არ გაცემულა. ეს რა თქმა უნდა პოლიტიკური კულტურის დონეზე მიუთითებს, განსაკუთრებით მაშინ, როდესაც ქვეყანაში აშკარად არის სიმართლის პრობლემა; მაშინაც, როცა მწარე სიმართლეს გვიწევს გავუსწოროთ თვალი. მაშინ, როდესაც ვსაუბრობთ პოლიტიკურ კლასზე, რომლის პასუხისმგებლობაც უნდა იყოს ბევრად უფრო მაღალი და რაც მთავარია, ჩვენთან არის უზარმაზარი დეფიციტი გაცემულ დაპირებებზე პასუხისმგებლობის. ეს არის უმნიშვნელოვანესი და ამიტომ, ჩვენ ვერთიანდებით სიმართლისთვის და მოქმედებისთვის. სიმართლე და ქმედება, ქმედება და სიმართლე – ეს იქნება პოლიტიკური გაერთიანების „საქართველოსთვის“ ძირითადი ლოზუნგი", - განაცხადა გახარიამ.
