ყველას მოვუწოდებთ გაერთიანებისა და შეთანხმების სრულად შესრულებისკენ - ნათქვამია შეერთებული შტატების სენატის ევროპისა და რეგიონული უსაფრთხოების ქვეკომიტეტის თავმჯდომარე სენატორ ჯინ შაჰინისა და რესპუბლიკელ რონ ჯონსონის ერთობლივ განცხადებაში, რომელიც საქართველოში პოლიტიკურ პარტიებს შორის შეთანხმებასთან დაკავშირებით გაკეთდა.
სენატორები მიესალმებიან შეთანხმების გაფორმებას მზადყოფნას გამოთქვამენ, საქართველოს მთავრობისა და ქართველი ხალხის დახმარებისთვის.
“ჩვენ საქართველოს გვერდში ვუდგავართ დემოკრატიული დაპირების შესრულებაში და ჩვენთვის სასიამოვნო იყო ის, რომ ექვსი თვის შემდეგ ქვეყანამ მიაღწია შეთანხმებას პოლიტიკური ჩიხური მდგომარეობის დასასრულებლად”, განაცხადეს სენატორებმა.
"საქართველოს პოლიტიკურ ბედს გავლენა აქვს არა მხოლოდ უშუალოდ მის ხალხზე, რომელიც ახლა პოლიტიკური არასტაბილურობასა და ეკონომიკურ სირთულეებთან ერთად კოვიდ-19-ის კრიზისის გავლენებსაც განიცდის, არამედ ის მსოფლიოში დემოკრატიების მდგომარეობის თვალსაზრისითაც მაჩვენებელია.
გუშინდელი შეთანხმება წინ გადადგმული ნაბიჯია ცოცხალი და სრულად ფუნქციონირებადი დემოკრატიის შექმნის მიმართულებით. ჩვენ ახლა ყველა მხარეს მოვუწოდებთ ქვეყნის საკეთილდღეოდ გაერთიანდნენ შეთანხმების სრულად შესასრულებლად, რაშიც მომავალში ჩიხური მდგომარეობის პრევენციისთვის, საარჩევნო და სასამართლო რეფორმები შედის. ჩვენ მზად ვართ საქართველოს მთავრობას და მის ხალხს დახმარება გავუწიოთ ისეთი ქვეყნის აშენებაში, რომელიც საკუთარ მოსახლეობას ემსახურება და გამჭვირვალობასა და ანგარიშვალდებულებას უზრუნველყოფს", ნათქვამია სენატორების ერთობლივ განცხადებაში განცხადებაში