იაპონიის პრემიერ-მინისტრი ნაოტო კანი თავს იკავებს კითხვაზე პასუხის გაცემისას, შედგება თუ არა მისი და რუსეთის პრეზიდენტი დიმიტრი მედვედევის შეხვედრა აზიურ-წყნარიოკეანის ეკონომიკური თანამშრომლობის სამიტის ფარგლებში. ინფორმაციას ამის შესახებ ტელეკომპანია "NHK" ავრცელებს.
"ამ მომენტისთვის შეხვედრის ჩატარების პერსპექტივები ჯერ განსაზღვრული არ არის", _ განუცხადა პრემიერმა ჟურნალისტებს.
ამავე დროს კრემლში აცხადებენ, რომ რუსეთის პრეზიდენტისა და იაპონიის პრემიერ-მინისტრის შეხვედრას ხელს არაფერი უშლის და რუსეთის პრეზიდენტი მზადაა, იაპონიის პრემიერს შეხვდეს.
შეგახსენებთ, რომ დღეს დილით იაპონიის ხელისუფლებამ რუსეთის პრეზიდენტის დიმიტრი მედვედევის მიერ კურილიის კუნძულების მონახულებაზე პროტესტის ნიშნად მოსკოვიდან თავისი ელჩის გამოწვევის გადაწყვეტილება მიიღო. მედვედევმა იაპონიის არაერთი გაფრთხილების მიუხედავად, კურილიის კუნძულები 1-ელ ნოემბერს მაინც მოინახულა. ამასთან, მედვედევის თანაშემწის მიერ დღეს გაკეთებული განცხადებით მედვედევი კურილიის კუნძულების მონახულებას კიდევ გეგმავს.
