აშშ-ის პრეზიდენტი დონალდ ტრამპი თავის სპეციალურ წარმომადგენლებს — სტივ უიტკოფსა და ჯარედ კუშნერს — პაკისტანში აგზავნის, სადაც ისინი ირანელებთან მოლაპარაკებებში მიიღებენ მონაწილეობას.
როგორც CNN ადმინისტრაციის ორ წყაროზე დაყრდნობით იუწყება, ტრამპის წარმომადგენლები პაკისტანში ირანის საგარეო საქმეთა მინისტრ აბას არაღჩისთან შეხვედრაში ჩაერთვებიან.
წყაროების თქმით, აშშ-ის ვიცე-პრეზიდენტი ჯეი დი ვენსი ამ ეტაპზე შეხვედრაში მონაწილეობას არ გეგმავს, რადგან ირანის პარლამენტის სპიკერი მოჰამად-ბაგერ ღალიბაფიც არ დაესწრება მოლაპარაკებებს.
თუმცა ოფიციალური პირების განცხადებით, თუ მოლაპარაკებები პროგრესს აჩვენებს, ვენსი მზად იქნება ისლამაბადში გაემგზავროს, ხოლო მისი გუნდის წევრები უკვე იქნებიან პაკისტანში და პროცესში მიიღებენ მონაწილეობას.
შეგახსენებთ, რომ 21 აპრილს დონალდ ტრამპმა განაცხადა, რომ პაკისტანის თხოვნით ირანთან ცეცხლის შეწყვეტის რეჟიმი გაახანგრძლივა.
