საქართველოს პრეზიდენტი სალომე ზურაბიშვილი გამოვიდა ინიციატივით, ბათუმში ჩატარდეს ასოცირების სამიტი უკრაინისა და მოლდოვის პრეზიდენტების მონაწილეობით. ამის შესახებ სალომე ზურაბიშვილმა ევროპული საბჭოს პრეზიდენტ შარლ მიშელთან ერთობლივი პრესკონფერენციის დროს განაცხადა.
"ძალიან მნიშვნელოვანია, რომ ასოცირებამ მიიღოს სრულყოფილი სახე უკრაინასთან, მოლდოვასთან ერთად. შევთავაზე პრეზიდენტს, რომ ივლისში, როცა ტარდება ბათუმის უკვე ცნობილი კონფერენცია ევროკავშირთან, ეს კონფერენცია გადაიქცეს ასოცირების სამიტად და ევროკავშირთან ერთად დავპატიჟოთ უკრაინის, ასევე მოლდოვის პრეზიდენტი და ვიმსჯელოთ, თუ რა ფორმა შეიძლება, მიიღოს ამ ასოცირებამ, ფორმატმა, რომელიც გვაკავშირებს ამ სამ ქვეყანას და ევროკავშირს, რასაც აქვს ძალიან დიდი მომავალი", - განაცხადა სალომე ზურაბიშვილმა.
პრეზიდენტის თქმით, შარლ მიშელთან შეხვედრისას, მხარეებმა აღმოსავლეთ პარტნიორობის სამიტზეც ისაუბრებს.
"ეს ორი ფორმატი ერთმანეთს ავსებს და ორივე სრულყოფილად უნდა ავამოქმედოთ და ავამოქმედოთ ისე, რომ ამით რეგიონში შემოვიტანოთ მეტი სტაბილურობა და მეტი ეკონომიკური განვითარება. ამაში ჩვენი და ევროკავშირის ინტერესიც დევს, არა მხოლოდ ჩვენ მიმართ, არამედ მთლიანად რეგიონის მიმართ. ასევე მნიშვნელოვანია განვავითაროთ ის პროგრამები, რომელიც ფიზიკურად ადამიანებს აკავშირებს და აახლოებს ერთმანეთთან. კულტურა და განათლება არის ის ორი მიმართულება, სადაც საქართველო უნდა წავიდეს შორს და მაქსიმალურად უნდა გამოვიყენოთ ყველა შესაძლებლობა, რომ ჩვენმა და ევროკავშირის მოქალაქეებმა იგრძნონ, რომ ნამდვილად ერთ ოჯახს ეკუთვნიან!" - აღნიშნა ზურაბიშვილმა.