ბრიუსელში ევროკავშირის წევრი სახელმწიფოების მუდმივი წარმომადგენლები ბელარუსის მოქმედი პრეზიდენტის ალიაქსანდრ ლუკაშენკას რეჟიმის წინააღმდეგ სანქციების ახალ პაკეტზე შეთანხმდნენ.
ევროკავშირის ელჩებმა დღეს გამართულ შეხვედრაზე ერთხმად დაამტკიცეს სანქციების ახალი პაკეტი, რომელიც სავიზო და ქონებრივ აკრძალვებს მოიცავს.
ახალი პაკეტით სანქციები შეეხება არა მხოლოდ ფიზიკურ პირებს, არამედ რამდენიმე კომპანიას. საუბარია შვიდ ბელარუსულ კომპანიასა და ორგანიზაციაზე.
როგორც იუწყებიან, ე.წ. "შავ სიაში" შესული კომპანიები ვეღარ შეძლებენ ბიზნესის კეთებას ევროკავშირში და მათი აქტივები გაიყინება.
მოელიან, რომ სანქციების ახალი პაკეტი ოფიციალურად 17 დეკემბერს, ევროკავშირის საგარეო საქმეთა მინისტრთა საბჭოს სხდომაზე დამტკიცდება. დიდი ალბათობით, მინისტრთა საბჭოს სხდომაზე ახალი პაკეტი შეფერხებლად დამტკიცდება, ვინაიდან პრინციპული გადაწყვეტილება უკვე მიღებულია.
ევროკავშირის ქვეყნების საგარეო საქმეთა მინისტრებმა ნოემბრის შუა რიცხვებში გადაწყვიტეს ლუკაშენკასა და მის ოჯახთან ასოცირებული ინსტიტუტების, საწარმოებისა და კომპანიების წინააღმდეგ სანქციების გაფართოება.
მანამდე ევროკავშირმა უკვე დააკისრა სანქციები 55 ბელარუს მაღალჩინოსანს, რომლებიც სავარაუდოდ პასუხისმგებელნი არიან 9 აგვისტოს ჩატარებულ საპრეზიდენტო არჩევნებსა და სამართალდამცავი ორგანოების მხრიდან მომიტინგეების მიმართ განხორციელებულ ძალადობაზე.
ლუკაშენკა, რომელიც 26 წელია ხელისუფლების სათავეშია, აცხადებს, რომ 9 აგვისტოს საპრეზიდენტო არჩევნებში გაიმარჯვა ხმების 80 პროცენტით. ევროკავშირი არ ცნობს არჩევნების შედეგებს და ლუკაშენკას ლეგიტიმურ პრეზიდენტად არ აღიარებს.
