შეერთებული შტატების მოქმედი პრეზიდენტი დონალდ ტრამპი აცხადებს, რომ დანებებას არ აპირებს და აგრძელებს ბრძოლას არჩევნების შედეგების შესაცვლელად. ამის შესახებ მან ტელეკომპანია Fox News-ის ეთერში განაცხადა.
ტრამპის თქმით, მისი იურისტების გუნდი ცდილობს, დააჩქაროს დარღვევების შესახებ საქმეების სასამართლოებში განხილვა.
”ჩვენ ვაგრძელებთ მუშაობას და წინ მივიდივართ რიგ შემთხვევებში. ჩვენ დავაჩქარებთ [მათ განხილვას], როგორც კი შეგვიძლია. ჩვენს განკარგულებაში ძალიან ცოტა დრო გვაქვს", - თქვა ტრამპმა და დასძინა, რომ იგი "წუხს იმით, რომ ხელისუფლებაში არალეგიტიმური პრეზიდენტი მოდის".
ტრამპი ჯერ კიდევ უარს ამბობს, აღიაროს საპრეზიდენტო არჩევნების შედეგები, რომლის მიხედვითაც აშშ-ის 46-ე პრეზიდენტი ჯო ბაიდენი გახდა.
შეგახსენებთ, გუშინ, შეერთებული შტატების უზენასმა სასამართლომ უარყო ტეხასის შტატის გენერალური პროკურორის სარჩელი, რომლითაც 4 შტატის არჩევნების შედეგების გაბათილება იყო მოთხოვნილი. გარდა ამისა, 8 დეკემბერს უზენაესმა სასამართლომ ერთხმად უარყო რესპუბლიკელთა სარჩელი პენსილვანიის შტატში მილიონობით ხმების გაუქმების მოთხოვნით.
დონალდ ტრამპი 3 ნოემბრიდან აცხადებს, რომ დემოკრატებმა "მოპარეს არჩევნებში გამარჯვება" მასიური გაყალბების გზით. ამასთან, დღემდე არც ტრამპს და არც მის ადვოკატებს არ წარმოუდგენიათ გაყალბების დამაჯერებელი მტკიცებულებები.
ტრამპის გუნდის მიერ შეტანილი ათობით სარჩელი უარყოფილ იქნა სხვადასხვა შტატის სასამართლოებში. გასულ კვირას აშშ-ის გენერალურმა პროკურორმა უილიამ ბარმა განაცხადა, რომ აშშ-ის იუსტიციის სამინისტრომ საპრეზიდენტო არჩევნებში ვერ აღმოაჩინა ისეთი მასშტაბის გაყალბება, რომელიც ჯო ბაიდენის გამარჯვებას ეჭვქვეშ დააყენებდა.
ტრამპის უარი არჩევნების შედეგების აღიარებაზე ძირს უთხრის ამერიკაში დამკვიდრებულ საუკუნოვან ტრადიციას, რომელიც ოფიციალურ ინაუგურაციამდე პრეზიდენტების ადმინისტრაციებს შორის ძალაუფლების მშვიდობიან გადაბარებას უზრუნველყოფს.
არჩევნების შედეგების მიხედვით, ჯო ბაიდენს საარჩევნო კოლეგიის ელექტორთა 306 ხმა აქვს ტრამპის 232 ხმის წინააღმდეგ. გამარჯვებისთვის 270 ხმაა საკმარისი.
