რუსეთის დედაქალაქში კორონავირუსის წინააღმდეგ მოსახლეობის ფართომასშტაბიანი ვაქცინაცია დაიწყეს. 

რუსული მედიის ინფორმაციით, 5 დეკემბრიდან მოსკოვში ამოქმედდა უფასო ვაქცინაციის 70 ცენტრი, სადაც შესაძლებელი იქნება რუსული წარმოების ვაქცინის, "სპუტნიკ V"-ით აცრა.

როგორც იუწყებიან, პირველ ეტაპზე საგანმანათლებლო, ჯანდაცვისა და სოციალური დაცვის დაწესებულებების თანამშრომლებს შეეძლება აიცრან. მომავალში, ეს სია გაფართოვდება.

მოსკოვის მერის სერგეი სობიანინის თქმით, ვაქცინაციის მსურველთა ელექტრონული რეგისტრაციის დაწყებიდან პირველ ხუთ საათში, 5 000 ადამიანი დარეგისტრირდა.

ვაქცინაციის ცენტრები, რომლებიც მოსკოვში მდებარე პოლიკლიკინებში გაიხნა, კვირაში შვიდი დღე, დილის 08:00 საათიდან 20:00 საათამდე იმუშავებენ.

ვაქცინის გაკეთება შეუძლიათ მოსკოვის 18-დან 60 წლამდე მაცხოვრებლებს, რომელთაც არ აქვთ ქრონიკული დაავადებები, ვაქცინაციის დღემდე ორი კვირის განმავლობაში არ იყვნენ ავად, არ არიან ორსულად და ძუძუთი კვებაზე არ ჰყავთ ჩვილი.

რუსეთის ჯანდაცვის სამინისტრომ ვაქცინა Sputnik V აგვისტოში დაარეგისტრირა.

27 ოქტომბერს რუსეთმა ჯანმრთელობის მსოფლიო ორგანიზაციას გაუგზავნა განცხადება Sputnik V-ის დაჩქარებული რეგისტრაციის შესახებ.

რუსეთ იუწყება, რომ მათ მიერ წარმოებული ვაქცინა 95%-ით ეფექტურია. სხვა ალტერნატიული ცნობა რუსული წარმოების ვაქცინის ეფექტურობის შესახებ არ ვრცელდება.