Covid-19-ის ვაქცინის მნიშვნელოვან დადებით გავლენას 2021 წლის ზაფხულიდან ვიგრძნობთ, ხოლო ზამთარში ცხოვრება ჩვეულ რეჟიმს დაუბრუნდება. განაცხადა BBC-სთან ინტერვიუში Pfizer-ის და BioNTech-ის მიერ შემუშავებული ვაქცინის თანაავტორმა, უღურ საჰინმა.
პროფესორმა უღურ საჰინმა, რომელიც ასევე BioNTech-ის თანადამფუძნებელია, განაცხადა, რომ ეს ზამთარი მაინც რთული იქნება, რადგან ის დიდ გავლენა ვერ მოახდენს ინფიცირების ახალი შემთხვევების რაოდენობის შემცირებაზე.
მისივე თქმით, თავდაპირველად, ვაქცინა შესაძლებელს გახდის, ინფექციის გავრცელების მასშტაბი განახევრდეს.
"ღრმად ვარ დარწმუნებული, რომ ვირუსის ადამიანებს შორის გავრცელება ასეთი ეფექტურობის მქონე ვაქცინით, შესაძლოა არა 90%-ით, მაგრამ 50%-ით შემცირდეს. საბოლოო ჯამში, ეს გამოიწვევს ვირუსის გავრცელების მკვეთრ შემცირებას", - თქვა საჰინმა.
პროფესორის თქმით, დაახლოებით მომავალი წლის აპრილისთვის 300 მილიონი ადამიანი აიცრება.
"ზაფხული დაგვეხმარება, რადგან ინფიცირების მაჩვენელი ზაფხულში დაიწევს და მნიშვნელოვანია, რომ 2021 წლის შემოდგომა-ზამთრისთვის ვაქცინაციის მაღალ დონეს მივაღწიოთ", - დასძინა საჰინმა.
გასულ კვირას, BioNTech-მა და Pfizer-მა განაცხადეს, რომ წინასწარ მონაცემებზე დაყრდნობით, კორონავირუსის საწინააღმდეგო ვაქცინამ 90%-იანი ეფექტურობა აჩვენა.
ვაქცინის გამოცდაში დაახლოებით 43 000-მა ადამიანმა მიიღო მონაწილოება.
ვაქცინა ტარდება ორ დოზად, სამი კვირის ინტერვალით.