სტატისტიკა მეტყველებს, რომ მართვა ისევ ეფექტიანია, როგორიც პირველი ტალღის პირობებში. ამის შესახებ "ქართული ოცნების" აღმასრულებელმა მდივანმა ტელეკომპანია იმედის ეთერთი, გადაცემა "ქრონიკაში" განაცხადა.
ირაკლი კობახიძის თქმით, სტატისტიკურ მონაცემებს თუ შევადარებთ საქართველოსა და სხვა ქვეყნებს შორის ისეთივე განსხვავებაა, როგორც ცა და დედამიწა.
"საქართველოს ვითარება რომ შეადაროთ სხვა ქვეყნების მეორე ტალღას, სტატისტიკა მეტყველებს, რომ მართვა ისევ ეფექტიანია. როგორიც იყო პირველი ტალღის პირობებში, ასეა მეორე ტალღის პირობებშიც. ჩვენი ამოცანაა, რომ მიუხედავად ეკონომიკის ფართოდ გახსნისა, კოვიდის გავრცელება შევინარჩუნოთ რაციონალურ ფარგლებში. გავრცელება რა თქმა უნდა, იქნება და მოიმატებს, ეს ლოგიკურია, მაგრამ მთავარია, რომ ხელისუფლება ვითარებას აკონტროლებს და ეს კონტროლი აუცილებლად შენარჩუნდება", - განაცხადა ირაკლი კობახიძემ.
შეგახსენებთ, საქართველოში დღეს კორონავირუსით ინფიცირების ახალი 958 შემთხვევა გამოვლინდა.
ქვეყანაში ჯამში COVID-19-ის 16 285 შემთხვევაა დადასტურებული, მათგან 7 827 პაციენტი გამოჯანმრთელდა, 128 კი გარდაიცვალა.