ბიზნესზე ზეწოლის პრობლემები ნამდვილად იყო სახელმწიფოში, მაგრამ მე არცერთ ასეთ ფაქტს არ ვიცნობ. ასე უპასუხა "სტრატეგია აღმაშენებლის" ლიდერმა გიორგი ვაშაძემ "ღამის კურიერის" ჟურნალისტის შეკითხვას, ჰქონდა თუ არა ინფორმაცია მაშინ, როდესაც იუსტიციის მინისტრის მოადგილე იყო იმის შესახებ რომ ბიზნესზე ზეწოლა ხდებოდა.
მისი თქმით, არსებობდა ასეთი ინფორმაციები და დამოუკიდებლად სწავლობდა პროკურატურის რეფორმის სისტემას.
"2012 წელს პოლიტიკისკენ ნაბიჯი გადავდგი და ვცდილობდი პრობლემები მომეგვარებინა. ვცდილობდი მემუშავა ბიზნესის თავისუფლების კუთხით, მე ვხედავდი ბიზნესისთვის უამრავ პრობლემას. ვცდილობდი მომეწესრიგებინა პრობლემები.
ამ თემაზე მე ზურაბ ადეიშვილთან არ მქონია კომუნიკაცია. ასევე, მე მის კაბინეტში არასოდეს მინახავს ბიზნესმენები. მე ჩემს საქმეებზე შევდიოდი და ეს იყო სულ.
არც ერთი მოსადავებელი საკითხი არ არსებობს იმ სფეროში, სადაც მე ვიყავი. არ არსებობს საქმე, რომელსაც მე ხელი მოვკიდე და ბოლომდე არ მივიყვანე, ამიტომ წავედი პოლიტიკაში, რომ შეცდომები გამომესწორებინა.
იყო ბიზნესზე ზეწოლის პრობლემები ნამდვილად, სახელმწიფოში, მაგრამ მე არცერთ ასეთ ფაქტს არ ვიცნობ,"- განაცხადა გიორგი ვაშაძემ.