საქართველოს საგარეო საქმეთა მინისტრი დავით ზალკალიანი საქართველო-აზერბაიჯანის საზღვრის დამდგენი კომისიის საქმიანობასთან დაკავშირებით წამოწყებულ გამოძიებას ეხმიანება.
ზალკალიანის თქმით, გამოძიების დაწყების ფაქტია ვერ დააზიანებს საქართველო-აზერბაიჯანის ორმხრივ ურთიერთობებს.
"აზერბაიჯანი იყო, არის და რჩება საქართველოს სტრატეგიულ მოკავშირედ და მეგობარ ქვეყნად. ვერც გამოძიების დაწყების ფაქტი და ვერც ახლადაღმოჩენილ გარემოებებზე დაყრდნობით აზერბაიჯანულ მხარესთან მოლაპარაკებების გაგრძელება და სამართლიანი გადაწყვეტილების ძიების პროცესი, რომლის ფარგლებშიც ვეცდებით გადაიხედოს საზღვრის დადგენასთან დაკავშირებული წინასწარი შეთანხმებები, ვერ დააზიანებს ჩვენს ორმხრივ ურთიერთობებს.
აზერბაიჯანელ კოლეგასთან მქონდა დეტალური და შინაარსიანი საუბარი დელიმიტაცია-დემარკაციის პროცესთან დაკავშირებით და ვთანხმდებით, რომ აუცილებელია მოიძებნოს შეთანხმება ორივე მხარის ინტერესებიდან გამომდინარე. მოლაპარაკებების დროს აზერბაიჯანელ კოლეგებს გავუზიარეთ ახლადაღმოჩენილი გარემოებები, რაც მათმა მხარემ აბსოლუტურად ნორმალურად მიიღო.
ის, რასაც ჩვენი ოპონენტების მხრიდან ვისმენთ, არის პოლიტიკური მანიპულაციები და ანტისახელმწიფოებრივი დამოკიდებულება.
აღნიშნულ საკითხში, ჩვენი ინტერესების დაცვით, ვიქნებით თანმიმდევრულნი და დარწმუნებული ვარ, რომ აზერბაიჯანელ კოლეგებთან მივაღწევთ ისეთ შეთანხმებას, რომელიც ორივე მხარისთვის იქნება მისაღები და რომელიც არ დააზარალებს არცერთი მხარის ინტერესს", - განაცხადა ზალკალიანმა.
შეგახსენებთ, დღეს, დავით გარეჯის საქმის გამოძიებასთან დაკავშირებით საქართველოს საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსი ივერი მელაშვილი და საქართველოს შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა დააკავეს.