კოლეგებს ვთხოვ, შევათანხმოთ მაჟორიტარი კანდიდატები, რათა ფრონტალური დარტყმა ვაგემოთ ოლიგარქიულ რეჟიმს. აცხადებს ლეიბორისტული პარტიის ლიდერი შალვა ნათელაშვილი "რუსთავი 2"-თან საუბარში.
მისი თქმით, რეგიონების მაჟორიტარულ ოლქებში ოპოზიციამ კანდიდატები ერთმანეთთან მაქსიმალურად უნდა შეათანხმოს.
"ეს არის ისეთი კარგი დასაწყისი, რომელიც აუცილებლად უნდა გაგრძელდეს რეგიონებში, მით უფრო იმ პირობებში, როდესაც ერთმა მაჟორიტარმა, შეიძლება, გადაწყვიტოს მომავალი კოალიციური მთავრობის ბედი. ერთმა მაჟორიტარმა - ან კორუმპირებულმა, ოლიგარქიულმა, სატელიტმა, ყურით სათრევმა, ფულის ტომარამ, შეიძლება დააბრუნოს ქვეყანა წარსულში ან ერთმა მაჟორიტარმა, პარტიებში შეთანხმებულმა საერთო კანდიდატმა, შეიძლება, ქვეყანა გამოიყვანოს ამ სიბნელიდან.
ამიტომ, კოლეგებს დიდი პატივისცემით ვთხოვ, რომ განვიმსჭვალოთ იმით, რომ ეს არ არის პარტიული წინ დაჯექი-უკან დაჯექის საკითხი, ეს გახლავთ ქვეყნის მომავლის პრობლემა. მაქსიმალურად შევათანხმოთ მაჟორიტარი კანდიდატები სადაც ეს შესაძლებელია, რათა ფრონტალური დარტყმა ვაგემოთ ოლიგარქიულ რეჟიმს. ჯობია, პირველივე ტურში დავამთავროთ გველეშაპის არსებობა ჩვენს ქვეყანაში და ნუ გადავდებთ ამას სამეოროტუროდ," - განაცხადა შალვა ნათელაშვილმა.
