ბნელ ოთახში კატას ნუ ეძებთ, დავკავდეთ საქმით. ასე უპასუხა ეკონომიკის და მდგრადი განვითარების მინისტრმა, ნათია თურნავა, მთავრობის ადმინისტრაციაში გამართულ ბრიფინგზე, "ქართუ ფონდთან" დაკავშირებულ შეკითხვას.
"სერიოზული კითხვები დამისვით. ქართუ ფონდს საიდან აქვს სახსრები? ესაა კითხვა? იყო საუბარი თითქოს ქართუ ფონდს საიდან აქვს სახსრები. ძალიან კარგად იცის ყველამ რომ ბატონი ბიძინა ივანიშვილი და მისი ოჯახი არიან ერთადერთი მთავარი შემომწირველები ქართუ ფონდისა. უზარმაზარი ქველმოქმედება აქვთ მაგათ ქართუ ფონდს მიმართ განხრციელებული, 3 მლრდ-ზე მეტი. ძალიან გთხოვთ ბნელ ოთახში კატას ნუ ვეძებთ, დავკავდეთ საქმით", - თქვა ნათია თურნავამ.
საუბარია თბილისის ერთ-ერთი რეკრეაციული სივრცის, იპოდრომის გაყიდვაზე, რომელიც „ევროპული საქართველოს“ წევრის, ირაკლი აბესაძის ინფორმაციით „ქართუ ფონდმა“ შეისყიდა.
„იპოდრომი გაიყიდა. გამყიდველი - ბიძინა ივანიშვილი (შპს ,,ინვესტ კაპიტალი”) მყიდველი - ბიძინა ივანიშვილი (ფონდი ,,ქართუ”) ფასი - 60 მილიონი.იპოდრომის აღორძინება უნდა და ძველი კომპანია ვერ იზამდა? ფული გაათეთრა? საარჩევნოდ ფულის მობილიზება გააკეთა? ფონდ ქართუს მიწის საყიდლად ფული თვითონ მისცა, ოფშორულმა კომპანიამ, თუ სხვამ“, - წერს აბესაძე სოციალურ ქსელში.
ირაკლი აბესაძის განცხადებით, ეს ბიზნესგარიგება წინასაარჩევნო პერიოდში მრავალ კითხვას ბადებს.
მისი თქმით, ფონდი ვალდებულია გაასაჯაროვოს აღნიშნულ ბიზნესგარიგებასა და ტრანზაქციასთან დაკავშირებული ყველა დოკუმენტი.