ნიკა გვარამიამ პირდაპირ ეთერში აღიარა, რომ მან დანამდვილებით იცოდა დანაშაულის მზადების შესახებ. ამას ჩვენ ვერსად ვერ წავუვალთ და ვერ თვითონ წაუვა სადმე. სისხლის სამართლის შესაბამის მუხლში პირდაპირაა ჩანაწერი, შეუტყობინებლობა იმ პირის მიერ, ვინც დანამდვილებით იცის, რომ ჩადენილია ან მზადდება დანაშაული, არის ასევე დანაშაული, - ამის შესახებ „ქართული ოცნების“ კონსულტანტმა, ლაშა ნაცვლიშვილმა „დღის ქრონიკასთან“ საუბრისას განაცხადა.
„სახელმწიფომ მოახერხა და დისტანციურად უზრუნველყო გიორგი გაბუნიას უსაფრთხოება. ეს არაა ადვილი. მით უმეტეს, რომ შენ ბრალდებული ხარ ამ კონკრეტული პოლიტიკური ძალის მიერ. ჩვენ ვნახეთ დაბნეული გიორგი გაბუნიას კომენტარი, რომელსაც არც კი უთხრა გვარამიამ, არც გააფრთხილა იმის თაობაზე, რომ მას უსაფრთხოების ზომები მიეღო და უკვირდა კიდეც, სუს-მა როგორ არ გამწირა გვარამიასგან განაწირიო. გვარამიამ ის გაწირა და მასთან ერთად, კიდევ ვისგან იყო განაწირი, ესეც გამოძიების დასადგენია“ - განაცხადა ლაშა ნაცვლიშვილმა.
ნიკა გვარამიას ინფორმაციით, რამზან კადიროვის დაკვეთით გიორგი გაბუნიას მკვლელობა იგეგმებოდა. 15 ივნისს სუს-მა დაადასტურა, რომ შეკვეთით განზრახ მკვლელობის მომზადების ფაქტზე დაწყებული გამოძიების ფარგლებში რუსეთის მოქალაქეა დაკავებული.