მთავრობამ სამუშაოს მაძიებელთა პროფესიული მომზადება-გადამზადებისთვის 2 090 000 ლარი გამოყო. შესაბამისი დადგენილება საკანონმდებლო მაცნეში უკვე გამოქვეყნდა.
სამუშაოს მაძიებელთა პროფესიული მომზადება-გადამზადებისა და კვალიფიკაციის ამაღლების სახელმწიფო პროგრამის მიხედვით, პროფესიული მომზადება-გადამზადების მსურველი სამუშაოს მაძიებელთათვის გათვალისწინებულია მაქსიმუმ 1000 ლარიანი ვაუჩერი, რომელსაც პროგრამის მოსარგებლე, მისთვის სასურველ პროფესიულ სასწავლებელში წარადგენს და გაივლის მოკლევადიან სასწავლო კურსს.
ამასთან, პროგრამა ითვალისწინებს სტაჟირებას, რომლის შემთხვევაშიც გაიცემა სახელმწიფო სტიპენდია 200 ლარის ოდენობით. სტაჟირების მაქსიმალური ხანგრძლივობა განისაზღვრება დამსაქმებელთან შეთანხმებით და იგი არ აღემატება 3 (სამ) კალენდარულ თვეს.
პროგრამაში მონაწილეობისთვის აუცილებელია რეგისტრაცია შრომის ბაზრის მართვის საინფორმაციო სისტემა − www.worknet.gov.ge-ში.