"უკრაინელი ხალხის სურვილი, რომ ჰქონდეს ადგილობრივი ავტოკეფალური მართლმადიდებელი ეკლესია, სავსებით ლეგიტიმურად მიგვაჩნია, მით უფრო, რომ მას აქვს საკუთარი სუვერენული სახელმწიფო (კონკრეტულ პოლიტიკურ საზღვრებში მოქცეული), სადაც ცხოვრობს მილიონობით მართლმადიდებელ ქრისტიანი", - ფოთისა და ხობის მიტროპოლიტი გრიგოლი უკრაინის ავტოკეფალური ეკლესიის აღიარების საკითხს სოციალურ ქსელ "ფეისბუკზე" ეხმიანება.
მიტროპოლიტი გრიგოლის თქმით, საეკლესიო სამართლის პრინციპის თანახმად, დამოუკიდებელ სახელმწიფოს უფლება აქვს ჰქონდეს დამოუკიდებელი, ავტოკეფალური ეკლესია და რომ ეს უფლება ეხება უკრაინასაც.
"ავტოკეფალიის აღდგენის საკითხში ჩვენი ეკლესიისა და ჩვენთა წინაპართა გამოცდილება, გვეხმარება, რომ უკეთ გავიგოთ სხვათა ტკივილი და უკეთ გავაცნობიეროთ, თუ რა სირთულეებისა და რისკების წინაშე დგას უკრაინის საზოგადოება. ისტორიას კარგად ახსოვს 100 წლის წინანდელი ის არგუმენტები, რითაც რუსეთის ეკლესიის უწმიდესი სინოდი ეწინააღმდეგებოდა ქართველთაგან ავტოკეფალიის აღდგენის მოთხოვნას.
ვერავითარი არგუმენტი ვერ გადაწონის უკრაინელი ხალხის სურვილს - ჰქონდეს ადგილობრივი ავტოკეფალური მართლმადიდებელი ეკლესია. აქვე უნდა გავითვალისწინოთ, რომ ჩვენ ვსაუბრობთ ევროპის ერთ-ერთ დიდ სახელმწიფოზე, რომლის მოსახლეობის უმრავლესობა მართლმადიდებელი ქრისტიანია.
საქართველოს ეკლესიის ავტოკეფალიის აღდგენის ისტორიისადმი პატივისცემა გვავალებს, რომ გულისყურით და დიდი სიფრთხილით მივუდგეთ ამ საკითხს, რათა უნებლიეთ არ დავაზიანოთ უკრაინელი ხალხის ეროვნული და სულიერი ინტერესები.
აღნიშნულიდან გამომდინარე, ჩვენ პატივს მივაგებთ ერთმორწმუნე უკრაინელი ხალხის სურვილს, ჰქონდეს ადგილობრივი ეკლესია და იმედს გამოთქვამთ, რომ უკრაინის ავტოკეფალური მართლმადიდებელი ეკლესიის შემატება მსოფლიოს მართლმადიდებელ ეკლესიათა დიპტიქში გააძლიერებს მართლმადიდებლობის ხმას თანამედროვე სამყაროში.
რაც შეეხება კონსტანტინოპოლისა და რუსეთის საპატრიარქოთა შორის გაჩენილ უთანხმოებას, გვჯერა, რომ ეკლესიათა შორისი ურთიერთობების პრაქტიკაში დაგროვილი გამოცდილება, უწმიდეს საყდრებს შეაძლებინებს არსებული კრიზისის დაძლევას, რაც კიდევ უფრო მეტად გააძლიერებს მართლმადიდებელთა სულიწმიდისმიერ ერთობას", - ნათქვამია მიტროპოლიტი გრიგოლის განცხადებაში.
ხვალ, 27 დეკემბერს, საპატრიარქოში საქართველოს მართლმადიდებელი ეკლესიის წმინდა სინოდის სხდომა გაიმართება. როგორც ცნობილია, მღვდელმთავრები უკრაინის ახლადშექმნილი ეკლესიის ავტოკეფალიის აღიარების საკითხზე იმსჯელებენ.
ამ დრომდე, საქართველოს ეკლესიის ოფიციალურ წარმომადგენლებს ერთიანი პოზიცია უკრაინის ეკლესიის აღიარების საკითხთან დაკავშირებით არ გაუჟღერებიათ. აღსანიშნავია, რომ 46 მოქმედი მღვდელმთავრიდან მხოლოდ რამდენიმე ეპისკოპოსმა, მათ შორის, ბოდბელმა ეპისკოპისმა იაკობმა, დმანისისა და აგარაკ-ტაშირის მთავარეპისკოპოსმა ზენონმა, ჭყონდიდელმა მიტროპოლიტმა პეტრემ, დაუჭირა ღიად მხარი უკრაინის ეკლესიის აღიარებას.
"ჩემი ხმა ეკუთვნის უკრაინის მართლმადიდებელი ეკლესიის აღიარებას და მათი დიდი სიხარულის თანამონაწილეობას", - დაწერა "ფეისბუკზე" ჩრდილოეთ ამერიკის ეპისკოპოსმა საბამ.
შეგახსენებთ, რომ 15 დეკემბერს, კიევში, წმინდა სოფიას ტაძარში, უკრაინის ეკლესიების გამაერთიანებელ კრებაზე უკრაინული ეკლესიის მწემსმთავრად, 39 წლის მიტროპოლიტი ეპიფანე აირჩიეს, რომელიც პატრიარ ფილარეტის კანდიდატურას წარმოადგენდა.
