8-9 დეკემბერს, 15 საათიდან, ვერის ბაღშიმდებარე სტადიონზე, გაიმართება ტურნირი მინიფეხბურთში სამოყვარულო გუნდებს შორის. ტურნირის ორგანიზატორები არიან თბილისის მერია, თბილისის მულტიფუნქციური ბიბლიოთეკები, არასამთავრობო ორგანიზაცია „გენერატორი 9.8“ და საფეხბურთო კლუბი „ლოკომოტივი“.
„თბილისის მედიათეკების მთავარი მიმართულება საგანმანათლებლო ხასიათისაა, თუმცა ყოველთვის ვუჭერთ მხარს ჯანსაღი ცხოვრების პოპულარიზაციას. მოხარულები ვართ, რომ ჩვენს პარტნიორებთან, კლუბ „ლოკომოტივთან“ და „გენერატორ 9.8-სთან“ თანამშრომლობით ამ ტურნირის თითქმის პროფესიონალურ დონეზე ორგანიზება შევძელით და მონაწილეებს საყვარელი სპორტით დაკავების საშუალება კიდევ ერთხელ მივეცით. მადლობას ვუხდი ჩვენს თანაორგანიზატორებსა და ტურნირის ყველა მონაწილეს წარმატებას ვუსურვებ“, - ამბობს თბილისის მულტიფუნქციური ბიბლიოთეკების გაერთიანების დირექტორი ნინია მაჭარაშვილი.
ტურნირში 16 გუნდი მონაწილეობს. დღეს, 8 დეკემბერს, გაიმართება შესარჩევი ტური, ხოლო ხვალ სამი საუკეთესო, მათ შორის, ტურნირის გამარჯვებულიც გამოვლინდება.
ორგანიზატორების მხრიდან დაწესებულია პრიზები. გამარჯვებულ გუნდს კლუბი „ლოკომოტივი“ გადასცემს სამახსოვრო მედლებს, თასს, ასევე კლუბის სახელობით ფორმებს. თბილისის მულტიფუნქციური ბიბლიოთეკების მხრიდან დაწესებულია ცნობილი ფეხბურთელების ავტობიოგრაფიული წიგნები და მედიათეკების საწევრო ბარათები.
ტურნირზე დასწრება თავისუფალია
