საანგარიშო პერიოდში შეკრების და მანიფესტაციის უფლება ძირითადად დაცული იყო, თუმცა, მშვიდობიანი აქციის ჩატარებას ხშირ შემთხვევაში ხელს უშლიდა პარალელურად მიმდინარე კონტრაქციები, რომლებსაც აქციის მონაწილეთა მიმართ აგრესიულად განწყობილი ჯგუფები მართავდნენ, - ამის შესახებ სახალხო დამცველის ანგარიშშია ნათქვამი.
ანგარიშის მიხედვით, აღნიშნულის გამო მოქალაქეებს აქციის ჩატარება გაძლიერებული საპოლიციო დაცვის ქვეშ უწევდათ, ასევე, დაცვის მიუხედავად მაინც ჰქონდა ადგილი მათზე თავდასხმისა და ძალადობის შემთხვევებს.
"ასევე, სახალხო დამცველმა გამოავლინა შეკრების თავისუფლების შეზღუდვის ისეთი შემთხვევები, როდესაც შსს-ს წარმომადგენლები აქციის მონაწილეებს სამართლებრივ საფუძველზე მითითების გარეშე უშლიდნენ ხელს კარვების გაშლაში. ამ საკითზე სახალხო დამცველმა სარჩელი წარადგინა საქართველოს საკონსტიტუციო სასამართლოში, ხოლო თბილისის საქალაქო სასამართლოს სასამართლოს მეგობრის მოსაზრებით მიმართა. კიდევ ერთხელ მოვუწოდებ სამართალდამცავ ორგანოებსა და სხვა პასუხისმგებელს სტრუქტურებს, ხელოვნური და კანონშეუსაბამო არგუმენტით არ შეუშალონ ხელი აქციის მონაწილეებს შეკრების თავისუფლების რეალიზებაში", - ნათქვამია ანგარიშში.
