დღეს, 4 დეკემბერს სასტუმრო „ქორთიარდ მარიოტში" გარემოს დაცვისა და სოფლის მეურნეობის მინისტრის მოადგილე იური ნოზაძე ბუნების დაცვის მსოფლიო ფონდის (WWF) მიერ ორგანიზებულ კავკასიის ეკორეგიონის კონსერვაციის გეგმასთან დაკავშირებულ შეხვედრას დაესწრება.
ღონისძიებას ბუნების დაცვის მსოფლიო ფონდი (WWF), გერმანიის მთავრობის ფინანსური მხარდაჭერით (BMZ/KFW), მასპინძლობს.
შეხვედრას კავკასიის ექვსივე ქვეყნის - საქართველოს, სომხეთის, აზერბაიჯანის, თურქეთის, ირანისა და რუსეთის სამთავრობო, არასამთავრობო და სამეცნიერო წრეების წარმომადგენლები დაესწრებიან. შეხვედრა მიზნად ისახავს რეგიონში ახალი გარემოსდაცვითი გამოწვევების გათვალისწინებით კავკასიის ეკორეგიონის კონსერვაციის განახლებული გეგმის სამუშაო ვარიანტის განხილვასა და სრულყოფას.
