„შეჭრა საბჭოთა კავშირში“ - ასე ჰქვია გიორგი ბერნშტეინის წიგნს, რომლის პრეზეტნაცია „ისრაელის სახლში“ გუშინ გაიმართა. პრეზენტაციას „ისრაელის სახლის“ მოწვევით, თბილისში მყოფი ისრაელის დელეგაცია დაესწრო. დელეგაციას, ქნესეთის წევრი ისრაელის კოალიციური მთავრობის ეკონომიკური ბლოკის პარტიის - „ქულანუს წარმომადგენელი აქრამ ჰასონი ხელმძვანელობდა.
წიგნში მასში დოკუმენტურ მასალებზე დაყრდნობით მოთხრობილია გასული საუკუნის 80-იანი წლების ბოლოდან საბჭოთა კავშირიდან ებრაელთა მასობრივი რეპატრიაციის (დიდი ალია) პროცესზე და ამ მასშტაბურ მოვლენაში საქართველოს განსაკუთრებულ როლზე.
„წიგნი გვაწვდის ინფორმაციას, თუ როგორ გაიხსნა „რკინის ფარდის“ მიღმა, საბჭოთა კავშირის მასშტაბით, საქართველოში სოხნუთის პირველი წარმომადგენლობა, რა ადგილი უკავია მას ბოლო 30 წლის განმავლობაში ჰასბარას (ისრაელის მხარდაჭერის) განვითარებაში“, - განუცხადა „ჯი-ეიჩ-ენს“ გიორგი ბერნშტეინმა.
მისი თქმით, მომავალ წელს წიგნი გამოიცემა ინგლისურ და ებრაულ ენებზე.
პრეზენტაციაზე ქნესეთის წევრმა აქრამ ჰასონმა განაცხადა, რომ ისრაელის დელეგაცია სპეციალურად ამ წიგნის პრეზენტაციისთვის ეწვია.
„ისრაელის დელეგაცია სპეციალურად ამ წიგნის პრეზენტაციისთვის ეწვია. ეს გამოცემა ებრაელი ხალხის ისტორიის უმნიშვნელოვანესი მოვლენის - დიდი ალიის შესახებ მოგვითხრობს. საბჭოთა კავშირში ებრაული სააგენტოს - სოხნუთის პირველ წარმომადგენელზე, იციკ მოშეზე დაყრდნობით მასში მოთხრობილია დიდი ალიის დღემდე გაუხმაურებელი ფაქტები. წიგნის ებრაულ- და ინგისურენოვან გამოცემას მკითხველი ასევე მოუთმენლად ელის“, - თქვა აქრამ ჰასონმა.
იციკ მოშემ ახლადგამოცემულ წიგნთან დაკავშირებით განაცხადა, რომ მასში აღწერილია დიდი ალიის ისეთი პერიპეტიები, რომელთა შესახებაც ამ თემაზე დღემდე არსებულ გამოცემებში საუბარი არ ყოფილა. წიგნში დაწვრილებით არის მოთხრობილი, თუ რა სიძნელეები ხვდა წილად ალიის პროცესს; განმარტებულია, რატომ გადაწყდა ისრაელის პირველი წარმომადგენლობის სწორედ საქართველოში დაარსება, როგორ გაიხსნა სოხნუთის პირველი წარმომადგენლობა საბჭოთა მუსლიმანურ რესპუბლიკაში და ა.
ისრაელის დელეგაციამ „ისრაელის სახლში“ ხანუქას სანთლის ანთების ცერემონიაში მიიღო მონაწილეობა. „ისრაელის სახლის“ ხელმძღვანელმა ისაუბრა ხანუქას დღესასწაულის მნიშვნელობაზე. მისი თქმით, ეს არის სინათლის სიბნელეზე, მცირერიცხოვანი ერების ოკუპანტზე გამარჯვების დღე, შესაბამისად, ეს დღესასწაული, სიმბოლურად, საქართველოსთვისაც აქტუალურია.
ვიზიტის მიმდინარეობისას აქრამ ჰასონი საქართველოში ისრაელური ინვესტიციით მიმდინარე პროექტებსაც გაეცნო.
აქრამ ჰასონი, საქართველო-ისრაელის ბიზნესპალატის პრეზიდენტთან, იციკ მოშესთან ერთად უკვე შეხვდა საქართველოს ეკონომიკისა და მდგრადი განვითარების მინისტრს, გიორგი ქობულიას. საუბარი საქართველო-ისრაელის ბიზნეს პალატის ინიციატივითა და ისრაელში საქართველოს საელჩოს აქტიური მონაწილეობით, მომავალი წლის დასაწყისში ისრაელში საქართველო-ისრაელის ბიზნეს ფორუმის ჩატარებას შეეხო. მხარეები შეთანხმდნენ, რომ ფორუმი იერუსალიმის ცნობილ სასტუმრო „ვალდორფ ასტორიაში“ ჩატარდება და მას საქართველოს და ისრაელის მთავრობების, აგრეთვე, მსხვილი ბიზნესის წარმომადგენლები დაესწრებიან.