აშშ-ის პრეზიდენტმა დონალდ ტრამპმა განაცხადა, რომ ამერიკული გამანადგურებლის ჩამოგდება გავლენას არ მოახდენს ირანთან მოლაპარაკებებზე, თუმცა NBC News-თან მიმდინარე სამძებრო-სამაშველო ოპერაციის შესახებ კომენტარის გაკეთებაზე უარი თქვა.
შეკითხვაზე, იმოქმედებდა თუ არა დღევანდელი მოვლენები (თვითმფრინავის ჩამოგდება) ირანთან მოლაპარაკებებზე, ტრამპმა უარყოფითად უპასუხა.
„არა, სულაც არა. არა, ეს ომია. ჩვენ ომში ვართ“, - თქვა ტრამპმა.
ტრამპმა ასევე The Independent-ს განუცხადა, რომ მას არ შეუძლია კომენტარის გაკეთება იმაზე, რას გააკეთებს, თუ ჩამოგდებული F-15-ის ეკიპაჟის მეორე წევრს ირანელები აიყვანენ ან დაჭრიან.
„ვიმედოვნებთ, რომ ეს არ მოხდება.“
მედიაში გავრცელებული ინფორმაციით, აშშ-ის სპეცდანიშნულების დანაყოფებმა ირანში ჩამოგდებული ამერიკული გამანადგურებლის ეკიპაჟის ერთ-ერთი წევრი იპოვეს და გადაარჩინეს.
ამერიკული თვითმფრინავის ჩამოგდების შესახებ ინფორმაცია პირველად ირანულმა მედიამ გაავრცელა.
აღნიშნული ინფორმაცია მოგვიანებით აშშ-მაც დაადასტურა.
მედიის ცნობით, სავარაუდოდ, საუბარია F-15-ის ტიპის გამანადგურებელზე.
ამასთან, New York Times-მა გაავრცელა ინფორმაცია, რომ 3 აპრილს ჰორმუზის სრუტეში, ამერიკული A-10-ის ტიპის მოიერიშე თვითმფრინავი ჩამოვარდა.
ოფიციალურმა პირებმა A-10-ის ჩამოვარდნის შესახებ მცირე დეტალები გაავრცელეს, მათ შორის, არაფერი უთქვამთ თუ როგორ და კონკრეტულად სად მოხდა ინციდენტი.
