სკოლებში ბავშვთა უფლებების დარღვევის ფაქტზე რეაგირებისთვის განათლების სამინისტროს სულ უფრო მეტი მშობელი მიმართავს. 2018 წლის ოქტომბრის მდგომარეობით მშობლების მიმართვიანობა გასული სრული წლის მაჩვენებელს უტოლდება. ძირითადი მიზეზი, რის გამოც მშობელი დახმარებას სამინისტროს სთხოვს მოსწავლეზე დირექტორის, მასწავლებლის ან თანატოლის მხრიდან ფიზიკური და ფსიქოლოგიური ძალადობაა. ასევე ხშირია ზეწოლის, სიტყვიერი შეურაცხყოფისა და ჩაგვრის ფაქტები.
ოფიაციალური ინფორმაცია განათლების სამინისტროდან არასამთავრობო ორგანიზაციამ „მშობლები განათლებისთვის“ გამოითხოვა. საგანგებოდ სკოლის მოსწავლეთა მშობლების დასახმარებლად და სკოლებში პრობლემების პრევენცის მიზნით ორგანიზაციაში უფასო საკონსულტაციო ცენტრიც მოქმედებს. სატელეფონო ნომერზე (032) 219 60 80 დაინტერესებული მშობლები გაივლიან კონსულტაციებს ისეთ საკითხებზე, როგორებიცაა მშობლისა და სკოლის უფლება- მოვალეობები, ბავშვზე ძალადობის პრობლემა, გასაჩივრების სკოლაში არსებული მექანიზმები თუ მიმდინარე სასწავლო პროცესთან დაკავშირებული სხვა თემები.
მეგი კავთუაშვილი, „მშობლები განათლებისთვის“ აღმასრულებელი დირექტორი - „სამწუხაროდ ამ დრომდე პრობლემად რჩება სკოლებსა და მშობლებს შორის სწორი კომუნიკაცია. ზოგჯერ კონფლიქტი იმდენად ღრმაა, რომ ხელჩართულ ომში გადადის, რის შედეგადაც კიდევ უფრო რთულდება მოსწავლეების მდგომარეობა. სატელეფონო ნომერზე 032 219 60 80 ათობით ზარი შემოდის სკოლაში არსებულ პრობლემებზე. ძირითადად, მშობლებს აწუხებთ, ძალადობრივი გარემო და მასწავლებლის მხრიდან ბავშვებზე ძალადობის პრობლემები. სკოლასთან დაკავშირებული საკითხებით დაინტერესებულ მშობლებს სპეციალისტები სატელეფონო მომსახურების ცენტრში გაუწევენ კონსულტაციას.“
