უკრაინის მართლმადიდებელი ეკლესიის (კიევის საპატრიარქოს) პატრიარქმა ფილარეტმა "რადიო თავისუფლებასთან" ინტერვიუში საქართველოს მართლმადიდებელ ეკლესიას შეახსენა, რომ ისიც მსგავს ვითარებაში იმყოფებოდა, როცა დაკარგა ავტოკეფალია რუსეთის სახელმწიფოს შემადგენლობაში შესვლის შემდეგ.
„გვსურს შევახსენოთ მათ, რომ იყო დრო, როცა რუსეთის სახელმწიფომ მოსპო საქართველოს ეკლესიის ავტოკეფალია და თბილისში დანიშნა რუსი ეგზარქოსი. ამდენად, საქართველოს ეკლესიას უნდა ახსოვდეს ისტორია. ასეთივე ისტორიას გადის უკრაინის მართლმადიდებელი ეკლესია. რა გვსურს საქართველოს ეკლესიისაგან? გვსურს, რომ როცა უკრაინის ეკლესია მიიღებს ავტოკეფალიის ტომოსს, საქართველოს ეკლესია შევიდეს ლოცვის ერთობაში უკრაინის მართლმადიდებელ ეკლესიასთან. და ჩვენ გვაქვს ამის იმედი, რადგან ქართველი ხალხი ისევე უჭერს მხარს უკრაინელ ხალხს, როგორც უკრაინელი ხალხი ქართველ ხალხს. ამის საფუძველზე ვიმედოვნებთ, რომ საქართველოს ეკლესია მხარს დაუჭერს უკრაინის მართლმადიდებელი ეკლესიის ავტოკეფალიას”, - განაცხადა პატრიარქმა ფილარეტმა და აღნიშნა, რომ უკრაინის ეკლესიისთვის ავტოკეფალიის მინიჭების პროცესის დაწყების შემდეგ მას საქართველოს პატრიარქთან კონტაქტი არ ჰქონია.
პატრიარქი ფილარეტი ამბობს, რომ საქართველოს ეკლესია, საბოლოოდ მხარს დაუჭერს უკრაინის ეკლესიას.
„შეიძლება გარკვეული ხნით ნეიტრალური იყოს, გარკვეული ხნით. თუმცა შეიძლება მაშინვე დაუჭიროს მხარი. მაგრამ საბოლოოდ მხარს დაუჭერს უკრაინის ეკლესიას“, - ამბობს რადიო თავისუფლებასთან ინტერვიუში კიევის პატრიარქი ფილარეტი.
