ოთხშაბათს, 3 ოქტომბერს, 14 საათზე, ბათუმში, დაავადებათა კონტროლის ცენტრში, შედგება შეხვედრა ტუბერკულოზის თემაზე. შეხვედრის ორგანიზებას ახდენს ჯანმრთელობის კვლევის კავშირი და დაავადებათა კონტროლის და საზოგადოებრივი ჯანდაცვის ეროვნული ცენტრი.
მონაწილეობას მიიღებენ საზოგადოებრივი ჯანდაცვის სპეციალისტები, ექიმები, მასწავლებლები, საზოგადოების სხვადასხვა ჯგუფების წარმომადგენლები.
საქართველოში უკანასკნელ წლებში აღინიშნება ტუბერკულოზის გავრცელების კლების ტენდენცია. მიუხედავად ამისა, საქართველოს მაჩვენებელი ჯერ კიდევ მნიშვნელოვნად აღემატება ევროპის რეგიონის და ევროკავშირის ქვეყნების შესაბამის მონაცემებს. 2017 წელს, საქართველოში, ყველა ფორმის ტუბერკულოზის 2927 შემთხვევა დარეგისტრირდა, მათ შორის 2131 ახალი შემთხვევაა.
აჭარა ტუბერკულოზის მაღალი გავრცელების რეგიონებს მიეკუთვნება. ამიტომ აჭარაში გამოცხადდა ე.წ. ნულოვანი ტუბერკულოზის ინიციატივა (Zero TB). ინიციატივის მიზანია მსოფლიოს სხვადასხვა ქალაქებში და რეგიონებში ტუბერკულოზის ელიმინაციის „კუნძულების“ შექმნა, რათა სხვადასხვა სტრუქტურების ერთობლივი ძალისხმევით (ადგილობრივი მთავრობა, სამოქალაქო სექტორი და სხვ) შემცირდეს ტუბერკულოზით ინფიცირების შემთხვევები.
