მეორე საერთაშორისო კონფერენცია"კონკურენციის პოლიტიკა: ტენდენციები და გამოწვევები" საქართველოს დემოკრატიული რესპუბლიკისა და ივანე ჯავახიშვილის სახელობის თბილისის სახელმწიფო უნივერსიტეტის 100 წლის იუბილეებს მიეძღვნა, რომელსაც 30-მდე ქვეყნის მაღალი რანგის პირი და ორასამდე მონაწილე ესწრება, მათ შორის: საქართველოს მთავრობის, პარლამენტის, ადგილობრივი და საერთაშორისო ორგანიზაციების, სხვადასხვა ქვეყნის კონკურენციის უწყებების, აკადემიური წრეების, ბიზნეს ასოციაციებისა და სამოქალაქო სექტორის წარმომადგენლები. კონფერენციაზე სიტყვით გამოვიდნენ: საქართველოს კონკურენციის სააგენტოს თავმჯდომარე - თსუ-ს პროფესორი, ნოდარ ხადური; ივანე ჯავახიშვილის სახელობის თბილისის სახელმწიფო უნივერსიტეტის რექტორი, გიორგი შარვაშიძე; დარგობრივი ეკონომიკისა და ეკონომიკური პოლიტიკის კომიტეტის თავმჯდომარე, რომან კაკულია; საქართველოში ევროკავშირის წარმომადგენლობის პროექტების განყოფილების უფროსი, ვინსენტ რეი; ევროკავშირის პროექტის „საქართველოს კონკურენციის სააგენტოს მხარდაჭერა“ გუნდის ხელმძღვანელი, აურელიო ლა ტორე; B&S Europe-ის აღმასრულებელი დირექტროის მოადგილე, მიხაელა დასკულტუ და ა.შ. მონაწილეები მსჯელობენ ისეთ მნიშვნელოვან საკითხებზე, როგორიცაა კონკურენციის გაუმჯობესების გზები; კონკურენციის პოლიტიკის ტენდენციები და გამოწვევები; საქართველოს კონკურენციის სამართლის ევროპულ კანონმდებლობასთან ჰარმონიზაციის პერსპექტივები და ა.შ. კონფერენციის განხორციელების მიზანია, როგორც საერთაშორისო, ისე ადგილობრივ დონეზე საქართველოს კონკურენციის სააგენტოს ცნობადობის გაზრდა; კონკურენციის პოლიტიკის, კულტურის დანერგვა, ხელშეწყობა და მართვა.
28-29 სექტემბერს, საქართველოს კონკურენციის სააგენტო, ივანე ჯავახიშვილის სახელობის თბილისის სახელმწიფო უნივერსიტეტთან ერთად, ევროკავშირის პროექტის "საქართველოს კონკურენციის სააგენტოს მხარდაჭერა" დახმარებით, მეორე საერთაშორისო კონფერენციას "კონკურენციის პოლიტიკა: ტენდენციები და გამოწვევები" მართავს.
