ბათუმის მერმა ლაშა კომახიძემ, აჭარის ა.რ. მთავრობის თავმჯდომარემ თორნიკე რიჟვაძემ და აჭარის ა.რ. უმაღლესი საბჭოს თავმჯდომარემ დავით გაბაიძემ საპატიო ბათუმელისა და საპატიო მოქალაქის წოდებით სხვადასხვა სფეროში გამორჩეული ოთხი პირი დააჯილდოვეს.
დაჯილდოებისას ლაშა კომახიძემ აღნიშნა, რომ წელს პირველად, საპატიო ბათუმელები სპეციალური კომისიის მიერ იქნა შერჩეული.
,,საპატიო ბათუმელის დაჯილდოება, მოგეხსენებათ, ბათუმობის დღესასწულის განუყოფელი ნაწილია. აქ შევიკრიბეთ იმისთვის, რომ დავაფასოთ ამ ადამიანების ღვაწლი და პატივი ვცეთ მათ დამსახურებებს. განსაკუთრებული პატივით მინდა გავიხსენო ის საამაყო და საპატიო ბათუმელები, რომლებიც, სამწუხაროდ, ჩვენს გვერდით აღარ არიან” - განაცხადა ლაშა კომახიძემ.
საპატიო ბათუმელის წოდება მიენიჭათ:
ალექსანდრა (დოდო) ჯვარშეიშვილს, რომელიც აჭარის დამსახურებული პედაგოგი, ბათუმის ხელოვნების სასწავლო უნივერსიტეტის პროფესორ-კონსულტანტი, ღირსების ორდენის კავალერი და არაერთი თაობის აღმზრდელია.
დამსახურებულ მხატვარს, ჯიმსონ გურგენიძეს.
შოთა ზოიძეს, რომელიც არის პოეტი, ფილოლოგიის მეცნიერებათა დოქტორი, პროფესორი, საქართველოს სახელმწიფო პრემიის ლაურეატი და ღირსების ორდენის კავალერი.
ელგუჯა მეძმარიაშვილს კი, საპატიო მოქალაქის წოდება მიენიჭა. ის საქართველოს მეცნიერებათა ეროვნული აკადემიის აკადემიკოსი, პროფესორი, ტექნიკისა და სამხედრო მეცნიერებათა დოქტორი, ვახტანგ გორგასლისა და ღირსების ორდენის კავალერია, ასევე არის პირველი ქართული კოსმოსური ობიექტის გენერალური კონსტრუქტორი.
