ჯონ მაკ-კეინს დღეს 82 წელი შეუსრულდებოდა.
ჯონ სიდნი მაკ-კეინი III 1936 წლის 29 აგვისტოს დაიბადა, თუმცა რამდენიმე დღის წინ ხალგრძლივი ავადმყოფობის შედეგად გარდაიცვალა.
აშშ-ის სენატორი არიზონიდან 1987-დან 2018 წლამდე. 2008 წლის აშშ-ის საპრეზიდენტო არჩევნებში იყო კანდიდატი რესპუბლიკური პარტიიდან.
მაკ-კეინის ბაბუა და მამა აშშ-ის საზღვაო ფლოტის ოთხვარსკვლავიანი ადმირალები იყვნენ. 1958 წელს აშშ-ის საზღვაო აკადემია ჯონმაც დაამთავრა. ამის შემდეგ იგი გახდა საზღვაო ფლოტის მფრინავი. მონაწილეობდა ვიეტნამის ომში. 1967წლის ივლისში ავიამზიდ „ფორესტალზე“ ხანძრის დროს ძლივს გადაურჩა სიკვდილს. 1967 წლის ოქტომბერში, ჰანოისდაბომბვის დროს იგი ჩამოაგდეს, რის შემდეგაც მან 5,5 წელი მძევლობაში გაატარა, სადაც სერიოზულ წამებას გაუძლო. 1973 წლის მაისში ის პარიზის სამშვიდობო შეთანხმების შემდეგ გაათავისუფლეს.
1981 წელს მაკ-კეინმა თავი დაანება საზღვაო ფლოტს, გადავიდა არიზონაში და მალე ჩაერთო პოლიტიკაში. 1982 წელს იგი აირჩიეს წარმომადგენელთა პალატაში არიზონის პირველი საარჩევნო უბნიდან. წარმომადგენელთა პალატაში ორი ვადით მოღვაწეობის შემდეგ, 1986 წელს იგი აშშ-ის სენატში არიზონიდან აირჩიეს. ხელახლა აირჩიეს 1992, 1998 და 2004წლებშიც.
მაკ-კეინი იყო პრეზიდენტობის კანდიდატი რესპუბლიკური პარტიიდან 2000 წლის არჩევნებში, მაგრამ პრაიმერებში დაამარცხა ჯორჯ ბუშმა.
2008 წლის აშშ-ის საპრეზიდენტო არჩევნებში იყო კანდიდატი რესპუბლიკური პარტიიდან, თუმცა დამარცხდა დემოკრატების კანდიდატ ბარაკ ობამასთან.
2017 წელს მაკ-კეინს ტვინის სიმსივნის დიაგნოზი დაუსვეს. 2018 წლის აგვისტოში, მაკ-კეინის ოჯახმა განაცხადა, რომ იგი კიბოს მკურნალობას აღარ გააგრძელებდა. გარდაიცვალა 25 აგვისტოს, 81 წლის ასაკში, 82-ე დაბადების დღემდე ოთხი დღით ადრე.
