გუშინ, ბათუმში, რესტორან "გრილ თაუნში" მომხდარი ინციდენტის გამო, რესტორნის მენეჯერმა სამსახური დატოვა.
როგორც რესტორნის ერთ-ერთი სტუმარი სალომე უგულავა სოციალურ ქსელში წერს, რუსეთ-ხორვატიის ფეხბურთის მატჩის ყურებისას, რესტორნის მენეჯერი და სტაფის ნაწილი რუსეთს გულშემატკივრობდა. მისივე ინფორმაციით, მატჩის დასრულების შემდეგ, მათ დამწუხრებულ რუს ტურისტებს "ხელები დაუკოცნეს".
"ბათუმის გრილთაუნს ბოიკოტი. მენეჯერი და სტაფის ნაწილი რუსეთს გულშემატკივრობდა და მერე ხელები დაუკოცნეს დამწუხრებულ რუს სტუმრებს", - წერს უგულავა.
მოგვიანებით, განცხადება გაავრცელა რესტორნის მენეჯერმა ბესო შავიშვილმა, სადაც ის აღნიშნავს, რომ მომხდარის გამო სამსახურს ტოვებს. მისი თქმით, ის ბავშვს ამშვიდებდა.
"მოგახსენებთ რომ საერთოდ არ ვარ ფეხბურთის ქომაგი და არასოდეს ვანიჭებ უპირატესობას რომელიმე გუნდს, გუშინ რუსეთის გულშემატკივრების მაგიდასთან ტიროდა ბავშვი რომლის დამშვიდებას ვცდილობდი რადგან სხვა სტუმრებს არ შეშლოდათ ხელი საფეხბურთო მატჩის ყურებაში. ეს იქნა შეფასებული როგორც ჩემი მხრიდან რუსეთის გულშემატკივრობა რაც არ შეესაბამება სინამდვილეს, მე არ დამვიწყებია რომ ჩემი ქვეყნის 20% არის ოკუპირებული და მამოძრავებდა მხოლოდ ბავშვის დამშვიდების სურვილი და არა რუსეთის გუნდის გულშემატკივრობა. ვიაზრებ ნაკისრ პასუხისმგებლობას მე უნდა გამეთვალისწინებია ყველა დეტალი და არავის გრძნობების შეურაცხყოფა არ განმიზრახავს. ასევე მივიღე დამსახურებული შენიშვნა ჩემი უფროსისგან და შექმნილ ვითარებაში ვთვლი რომ დაკავებული თანამდებობა უნდა დავტოვო. ძალიან გული მტკივა ჩემი საქციელი რომ იქნა არასწორედ გაგებული", - წერს შავიშვილი სოციალურ ქსელში.
ბესო შავიშვილის პოსტს სალომე უგულავა გამოეხმაურა და აღნიშნა, რომ ტყუილია, თითქოს მენეჯერი რუს ბავშვს ამშვიდებდა.
"გრილ თაუნმა სწორად ირეაგირა და რუსეთის ნაკრების გულშემატკივარი მენეჯერი გაათავისუფლა სამსახურიდან.
მენეჯერი წერს ტყუილებს, რომ რუს ბავშვს ამშვიდებდა მაგიდასთან. სამარცხვინოა ბავშვს ამოფარება, მაგრამ ახლა ეს მნიშვნელოვანი აღარაა. მთავარი რეაგირებაა", - წერს სალომე უგულავა.
