ბაქოში სამუშაო ვიზიტის ფარგლებში მიხეილ ჯანელიძემ შეხვედრა გამართა ირანის ისლამური რესპუბლიკის საგარეო საქმეთა მინისტრთან მოჰამად ჯავად ზარიფთან.
საქართველოსა და ირანის საგარეო საქმეთა მინისტრები მიესალმნენ აზერბაიჯანისა და თურქეთის მონაწილეობით ოთხმხრივ ფორმატში თანამშრომლობის დაფუძნებას და ხაზი გაუსვეს ამგვარი ფორმატის დიდ პოტენციალს რეგიონის განვითარებისა და ქვეყნებს შორის ურთიერთობების ახალი შესაძლებლობების წარმოჩენისთვის.
კმაყოფილებით აღინიშნა საქართველო-ირანის ორმხრივ ურთიერთობებში ბოლო წლების პოზიტიური დინამიკა, განსაკუთრებით სავაჭრო-ეკონომიკური და ხალხთაშორისი თანამშრომლობის განვითარების კუთხით. საქართველოს ეკონომიკური და საინვესტიციო შესაძლებლობების გათვალისწინებით ხაზი გაესვა ირანული ბიზნეს წრეებთან თანამშრომლობის დიდ პოტენციალს მრეწველობის სფეროში.
შეხვედრაზე აღინიშნა ორი ქვეყნის წარმატებული ურთიერობები, როგორც სამთავრობო ასევე საპარლამენტო განზომილებაში, ამ მხრივ ქართული მხარე მიესალმა საქართველოში ირანის პარლამენტის საქართველოსთან მეგობრობის ჯგუფის დელეგაციის მიმდინარე ვიზიტს.
საქართველოსა და ირანის საგარეო უწყების ხელმძღვანელებმა აღნიშნეს ორივე ქვეყნის მნიშვნელოვანი როლი საერთაშორისო ენერგეტიკულ და სატრანზიტო სფეროების განვითარებაში და გამოთქვეს მზადყოფნა შემდგომშიც აქტიურად ითანამშრომლონ ამ მიმართულებით.
