15 მარტს, 10:00 საათზე, სასტუმროში „რედისონ ბლუ ივერია“, საქართველოს ეკონომიკისა და მდგრადი განვითარების სამინისტროს სააგენტო „აწარმოე საქართველოში“ და გაერთიანებული სამეფოს კარგი მმართველობის ფონდი (UK Good Governance Fund) მცირე და საშუალო საწარმოებისა და მულტინაციონალური კორპორაციების დაკავშირების საპილოტე პროექტის პრეზენტაციას გამართავენ.
მოწვეულ სტუმრებს მისასალმებელი სიტყვით მიმართავენ საქართველოს ეკონომიკისა და მდგრადი განვითარების მინისტრის მოადგილე, გიორგი ჩერქეზიშვილი და ბრიტანეთის საელჩოს პირველი პოლიტიკური მდივანი, კარგი მმართველობის ფონდის ხელმძღვანელი საქართველოში, სიუზან სტერნი. პრეზენტაციას დაესწრებიან მცირე და საშუალო ბიზნესის, მულტინაცინალური და საერთაშორისო ბრენდის, ე.წ. „ფრენჩაიზინგის“ კომპანიების წარმომადგენლები, აგრეთვე, საქართველოში აკრედიტებული დიპლომატიური კორპუსის, საერთაშორისო და დონორი ორგანიზაციების წარმომადგენლები.
ტექნიკური დახმარების პროექტი, რომელიც გაერთიანებული სამეფოს კარგი მმართველობის ფონდის მხარდაჭერით ხორციელდება, მიზნად ისახავს ადგილობრივი მცირე და საშუალო ბიზნესის წარმომადგენლების წახალისებას და დახმარებას, დაამყარონ ბიზნეს კავშირები საქართველოში არსებულ მულტინაციონალურ და ე.წ. „ფრენჩაიზინგით“ შექმნილ კომპანიებთან მათთვის პროდუქციის და მომსახურების მიწოდების მიზნით.
პროექტის ფარგლებში ჩატარებული კვლევის შედეგად შესწავლილ იქნა საერთაშორისო სასტუმროების, რესტორნების ქსელების და უცხოური ინვესტიციით შექმნილი სამრეწველო საწარმოების მოთხოვნა საქონელსა და მომსახურებაზე. საპილოტე პროექტის ფარგლებში მოხდება საერთაშორისო სასტუმროების და რესტორნების ქსელების და ქართული ავეჯის, ტანსაცმლის, საკვების, სასმელის და შესაფუთი მასალების მწარმოებელი მცირე და საშუალო კომპანიების ბიზნეს კავშირების წახალისება. მულტინაციონალურ ბრენდებთან დასაკავშირებლად და პოტენციალის შესასწავლად, წინასწარ იდენტიფიცირებულმა მცირე და საშუალო ბიზნესის წარმომადგენლებმა შეავსეს შესაბამისი კითხვარი, რის მიხედვითაც პროექტის განხორციელების მომდევნო ეტაპზე მათთვის დაიგეგმება ტრენინგები და კონსულტაციები.
პროექტში ამ ეტაპზე ჩართულია 20-მდე მულტინაციონალური კომპანია და 15-მდე მცირე და საშუალო საწარმო.
