ულტიმატუმებით რომ ოკუპანტთან ლაპარაკი გამოდიოდეს დიდი ხნის წინ დაბრუნებული გვექნებოდა ჩვენი ტერიტორიები და არც ახალგაზრდა და არც ხანში შესული არ იქნებოდა გარდაცვლილი, მაგრამ ომში ვართ, - ამის შესახებ ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა მცხეთა-სტეფანწმინდის ცენტრალურ მაგისტრალთან განაცხადა, სადაც არჩილ ტატუნაშვილის ოჯახი საპროტესტო აქციას მართავს.
სუბარის თქმით, მისთვის გაუგებარია, რა ულტიმატუმი უნდა წაუყენონ, "როდესაც ტკივილშიც ერთი ვართ და სამშობლოს სიყვარულშიც", რაზეც არჩილ ტატუნაშვილის მამამ მინისტრს განმარტებები მოსთხოვა. მისი თქიმთ, თუ საომარი მდგომარეობაა, მაშინ რატომ გადაადგილდებიან რუსეთის სანომრე ნიშნებით მანქანები შეუფერხებლად საქართველოს მიერ კონტროლირებად ტერიტორიაზე.
„დღე არ გავა რომ რუსეთის მანქანამ არ გაიაროს აი აქ. თუკი ომის მდგომარეობაა რას დადიან ვერ გავიგე. ჩემი შვილი თავის სახლში შევიდა იქ მომიკლეს შვილი. იმის უფლება არა ჰქონდა და ამათ აქვთ უფლება რომ ესე ითარეშონ აქ", - განაცხადა არჩილ ტატუნაშვილის მამამ.
შეგახსენებთ, ადგილზე სპეცდანიშნულების რაზმია მობილიზებული.
სამართალდამცველების განსაკუთრებული მობილიზება მას შემდეგ გამოცხადდა, რაც ოკუპირებულ ტერიტორიაზე გარდაცვლილი არჩილ ტატუნაშვილის ახლობლებმა საავტომობილო გზა გადაკეტეს.
