რუსული გამოცემა, „ნეზავისიმაია გაზეტა“ სამხრეთ ოსეთში, ახალგორის რაიონში მომხდარი ტრაგიკული ფაქტის - საქართველოს მოქალაქის არჩილ ტატუნაშვილის დაღუპვის შესახებ წერს.
ტატუნაშვილი საოკუპაციო რეჟიმის წარმომადგენლებმა კიდევ ორ მოქალაქესთან - ლევან ქუტაშვილისა და იოსებ პავლიაშვილთან ერთად დააკავეს. როგორც სტატიის ავტორი, იური როქსი აღნიშნავს, არსებობს ვარაუდი, რომ არჩილ ტატუნაშვილი ცემის შედეგად გარდაიცვალა.
პუბლიკაციაში, ქართულ და ოსურ წყაროებზე დაყრდნობით, ვრცლადაა აღწერილი არჩილ ტატუნაშვილის მკვლელობის გარემოებები და მათთან დაკავშირებული მოვლენები, მათ შორის საქართველოს საგარეო საქმეთა სამინისტროს განცხადება, რომლის თანახმად, „მომხდარ ფაქტზე პასუხისმგებლობა რუსეთს ეკისრება, რომელიც აღნიშნულ ტერიტორიას აკონტროლებს“. საქართველო ასევე მიმართავს ჟენევის დისკუსიების თანათავმჯდომარეებს, რომ რეაგირება მოახდინონ ამ ფაქტზე, რათა მკვლელები აუცილებლად იქნენ დასჯილნი.
გარდა ამისა, სტატიაში მოცემულია საქართველოს პრეზიდენტის გ.მარგველაშვილის მიერ დანიის საგარეო საქმეთა მინისტრთან შეხვედრის დროს გამოხატული პოზიცია („არჩილ ტატუნაშვილი მრავალი წლის განმავლობაში გლობალური უსაფრთხოების სადარაჯოზე იდგა... იგი ქართველი მეომარი იყო, რომელიც საერთაშორისო მისიებში მსახურობდა. იგი გაიტაცეს და მოკლეს“), ასევე პრემიერ-მინისტრის გ.კვირიკაშვილის განცხადებაც მომხდარი ტრაგიკული ფაქტის გამოძიების, დამნაშავეთა აუცილებლად დასჯისა და დაკავებულების გათავისუფლების თაობაზე.
ევროკავშირის დამკვირვებელთა მისიამ საქართველოს ხელმძღვანელებს აღუთქვა, რომ მისიის წევრები, თავიანთი მანდატის ჩარჩოებში, ყურადღებით დააკვირდებიან მოვლენების განვითარებას. განცხადებაში ნათქვამია, რომ აუცილებელია ინფორმაციის გაცვლა [მხარეთა შორის] საქართველოს მოქალაქის დაღუპვის მიზეზების გამოსაკვლევად.
