საქართველოსათვის უვიზო რეჟიმის შესაძლოა გაუქმების საკითხს რუსული პრესაც ეხმაურება: გაზეთ «КоммерсантЪ»-ის დღევანდელ, 21 თებერვლის ნომერში დაბეჭდილია სტატია „შთამბეჭდავი“ სათაურით „საქართველოს უვიზო რეჟიმის თავზე გერმანია ჩამოწვა // ბერლინი ქართველი მოქალაქეების ქცევით შეშფოთდა“.
პუბლიკაციაში ვრცლადაა გადმოცემული თომას დე-მეიზერისა და მიხეილ ჯანელიძის განცხადებები, იუსტიციის მინისტრის თეა წულუკიანის თხოვნა თანამემამულეებისადმი - „ნუ გავწირავთ უვიზო რეჟიმსო“. ასევე ყურადღება ეთმობა პრეზიდენტის ადმინისტრაციის უფროსის გიორგი აბაშიშვილის განცხადებას, რომმლის თანახმად, საქართველოს უვიზო რეჟიმის წინააღმდეგ რუსეთი პროპაგანდისტულ შეტევას ახორციელებს.
როგორც «КоммерсантЪ»-მა დიპლომატიური წყაროებისაგან შეიტყო, ევროპულ სახელმწიფოებში საქართველოს ზოგიერთმა საელჩომ თბილისიდან დირექტივები მიიღო, რომ მათ აკრედიტაციის ქვეყნების მთავრობებთან კონსულტაციები გამართონ „ვიზალიბერალიზების შენარჩუნების“ თემაზე. საელჩოების თანამშრომლებმა „მტკიცედ განაცხადონ, რომ თბილისი უვიზო რეჟიმის სრული გაუქმების კატეგორიული წინააღმდეგია და რომ ვიზალიბერალიზაცია უდიდესი მიღწევაა ქვეყნის დამოუკიდებლობის მთელ პერიოდში“. თუმცა, ამავე დროს, თბილისი აქტიურად არ გაუწევს წინააღმდეგობას, თუ ევროკავშირი დააჩქარებს „წინასწარი ელექტრონული რეგისტრაციის შემოღებას ქართველი მოგზაურებისათვის“, ანუ, თავისი არსით, ვიზის გამარტივებულ ფორმას.
გიორგი დვალი, ელენა ჩერნენკო
