საგარეო საქმეთა მინისტრის მოადგილემ, ხათუნა თოთლაძემ პროექტის სერვისების გაერო-ს ოფისის ევროპული ოპერაციების ხელმძღვანელთან, არმენ ჩობანიანთან შეხვედრა გამართა.
შეხვედრისას, არმენ ჩობანიანმა ისაუბრა გაერო-ს ოფისის სამომავლო გეგმებზე საქართველოსთან დაკავშირებით და აღნიშნა, რომ გაერო-ს ოფისი აპირებს საქართველოში საქმიანობას და ამ მიზნით, საკუთარი წარმომადგენლობის გახსნას.
თავის მხრივ, ხათუნა თოთლაძემ განაცხადა, რომ საქართველო სრულად იზიარებს და მხარს უჭერს გაერო-ს ოფისის მიზნებსა და სულისკვეთებას, შესაბამისად, მაქსიმალურად შეუწყობს ხელს მის საქმიანობას საქართველოში.
ამასთან, საგარეო საქმეთა მინისტრის მოადგილემ განაცხადა, რომ საქართველო ახორციელებს მსხვილ პროექტებს ისეთ სფეროებში, როგორიც არის სატრანსპორტო, ენერგეტიკის, ჯანდაცვისა და განათლების ინფრასტრუქტურა, და სწორედ ასეთი პროექტების მდგრად და ეფექტიან იმპლემენტაციაში ძალზე სასარგებლო იქნება პროექტის სერვისების გაერო-ს ოფისის ექსპერტიზა და გამოცდილება.
