განათლებისა და მეცნიერების მინისტრ, მიხეილ ჩხენკელის განცხადებით, სტუდენტები, რომლებიც „ჰიპოკრატესა“ და „თბილისის საერთაშორისო აკადემიაში“ სწავლობენ, მობილობით სხვადასხვა უმაღლეს სასწავლებელში გადანაწილდებიან.
მინისტრის თქმით, განათლების ხარისხზე ზრუნვა განათლების სამინისტროს უმთავრესი სტრატეგიული მიმართულებაა.
„განათლების ხარისხის განვითარების ეროვნული ცენტრი გამოაცხადებს რიგგარეშე მობილობას მხოლოდ ამ სასწავლებლების სტუდენტებისთვის და ასევე კონსულტაციებსაც გაუწევს. სტუდენტებს საკუთარი არჩევანის საფუძველზე საშუალება ექნებათ, რომ სწავლა გააგრძელონ ავტორიზებულ უმაღლეს სასწავლებლებში. დეტალები ცენტრის ვებ-გვერდზე გამოქვეყნდება.
აღნიშნულ სასწავლებლებში დარღვევები ეხებოდა განათლების ხარისხს. ჩვენთვის მთავარ საზრუნავს სწორედ განათლების ხარისხი წარმოადგენს და სახელმწიფომ სიმართლე უნდა უთხრას ყველა ოჯახს, ყველა აბიტურიენტს, ყველა სტუდენტს და ეს სიმართლე მდგომარეობს იმაში, რომ ავტორიზებული უმაღლესი სასწავლებლები არიან ისინი, რომელთაც აქვთ მაღალი აკადემიური ხარისხი. არსებობს აპელაციის პროცესი, თუ ავტორიზაცია შეჩერებული სასწავლებლები შემოიტანენ განცხადებას, აკრედიტაციის საბჭო მათ განცხადებას განიხილავს", - განმარტა მინისტრმა.
ცნობისთვის, უნივერსიტეტ "ჰიპოკრატესა" და შპს "თბილისის საერთაშორისო აკადემიას" ავტორიზაცია გაუუქმდა
