თავდაცვის მინისტრის მოადგილის, ნუკრი გელაშვილის განცხადებით, საგანგებო მდგომარეობის დროს მობილიზაციის გამოცხადება მთავრობის ნაცვლად, კვლავ პრეზიდენტის უფლება-მოვალეობებში შევა.
აღნიშნული განცხადება მინისტრის მოადგილემ თავდაცვის და უშიშროების კომიტეტის სხდომის დასრულების შემდეგ განაცხადა.
"შემოთავაზებული კანონპროექტით, პრეზიდენტს ჰქონდა უფლებამოსილება, რომ საომარი მდგომარეობის დროს გამოეცხადებინა მობილიზაცია. რაც შეეხება საგანგებო მდგომარეობის დროს მობილიზაციის გამოცხადებას, ჩვენ მიერ შემოთავაზებული კანონპროექტით, ეს უფლებამოსილება ჰქონდა მთავრობას. სწორედ ამაზე გაიმართა მსჯელობა. ეროვნული უშიშროების საბჭოს წარმომადგენელმა წარმოადგინა მოსაზრება, რომ პრეზიდენტის უფლებამოსილებაში დაბრუნებულიყო კვლავ საგანგებო მდგომარეობის დროს მობილიზაციის გამოცხადება. ჩვენ ფაქტობრივად, ამ მოსაზრებას დავეთანხმეთ. მეორე მოსაზრება იყო ,ასევე, უშიშროების საბჭოს აპარატის მხრიდან წარმოდგენილი პარლამენტის მონაწილეობის შესახებ მობილიზაციის გამოცხადების პროცესში. ჩვენს ვერსიაში პარლამენტი არ მონაწილეობდა პროცესში და დეპუტატები ამაზე დაგვთანხმდნენ. ეს მონაკვეთი ჩვენ მიერ შემოთავაზებულ ვერსიაში რჩება. მობილიზაციის გამოცხადების პროცესში პარლამენტი არ მიიღებს მონაწილეობას. მესამე მოსაზრება შეეხებოდა ეროვნული თავდაცვის გეგმის დამტკიცებას, მათი მოსაზრებით, ეს უნდა ყოფილიყო პრეზიდენტის პრეროგატივა, ჩვენი ხედვით კი, ეს უნდა იყოს მთავრობის მიერ მიღებული გადაწყვეტილება. ეს მონაკვეთი ჩვენ მიერ შემოთავაზებული სახით რჩება", - განაცხადა გელაშვილმა.
