თურქეთის პრეზიდენტ რეჯეფ თაიფ ერდოღანის განცხადებით, თურქეთმა ყველაფერი გააკეთა, ახლა ევროკავშირმაც უნდა შეასრულოს დაპირება.
„ჩვენ გვსურს ევროკავშირის სრულფასოვანი წევრობა, სხვა გადაწყვეტილებას არ მივიღებთ. კრიტერიუმების დასაკმაყოფილებლად თურქეთმა ყველაფერი გააკეთა. გაწევრიანება ორხმრივი პროცესია, ევროკავშირმაც უნდა შეასრულოს დაპირება“, – განაცხადა ერდოღანმა.
მისი შეფასებით, ევროკავშირი თურქეთის ორგანიზაციაში გაწევრიანების პროცესს აფერხებს, შემდეგ კი ყველაფერში თურქეთს ადანაშაულებს.
„ეს არასამართლიანია. ევროკავშირის რამდენიმე ქვეყანა გვთავაზობს ალტერნატიულ ვარიანტს, ეს უსამართლობაა“, – განაცხადა ერდოღანმა.
თურქეთის პრეზიდენტი დღეს იტალიაში ჩავიდა. იმ სასტუმროს ტერიტორიასთან, სადაც რეჯეპ თაიფ ერდოღანი ცხოვრობს, უსაფრთხოების ზომები მაქსიმალურადაა გამკაცრებული.
