კიევში, დღეს საპროტესტო აქცია იმართება. მიხეილ სააკაშვილის მხარდამჭერები და უკრაინის ოპოზიციური ძალები იმპიჩმენტის მარშზე შეიკრიბებიან.
საპროტესტო მსვლელობა პოროშენკოს და მისი გარემოცვის წევრების გადადგომის მოთხოვნით, ადგილობრივი დროით, 12 საათზე ტარას შევჩენკოს მოედანიდან დაიწყება.
სააკაშვილი ვარაუდობს, რომ მისი პარტიის მიერ კიევში დაგეგმილ დღევანდელ მარშზე შესაძლოა, პროვოკაციები მოხდეს. ამის შესახებ მან „ფეისბუქის“ საკუთარ გვერდზე დაწერა.
„გავიგე, რომ 4 თებერვალს კიევის ცენტრში ორგანიზაცია „Авто Евро Сила“-ს საპროტესტო აქცია იგეგმება. თანაც, ბოლო მომენტში ორგანიზატორებმა შეცვალეს აქციის დრო ისე, რომ ის პოროშენკოს გადაყენების მოთხოვნით ჩვენს მრავალრიცხოვან მარშს დაემთხვეს. მე მაქვს ზუსტი ინფორმაცია, რომ ორგანიზაციის ხელმძღვანელმა პრეზიდენტის ადმინისტრაციისგან მიიღო ფული იმისთვის, რომ ხელი შეუშალოს ჩვენს მარშს. ამავდროულად, ადმინისტრაციამ გამზირზე დაამონტაჟა რკინის კონსტრუქციები, რათა ჩვენ სცენა არ აღვმართოთ“, - წერს სააკაშვილი.
ყოფილი პრეზიდენტის თქმით, მისი პარტია საკუთარ თავზე ვალდებულებას იღებს, მოკლე დროში გაათავისუფლოს უკრაინის ავტობაზარი მონობისა და არაჯანსაღი კონკურენციისგან და ყველა მანქანის 300 ევროდ განბაჟება უზრუნველყოს.
საპროტესტო გამოსვლების განახლების შესახებ მიხეილ სააკაშვილმა განცხადება სააპელაციო სასამართლოში გააკეთა. ეს მას შემდეგ მოხდა, რაც სააპელაციო სასამართლომ ქვედა ინსტანციის გადაწყვეტილება გააუქმა და მიხეილ სააკაშვილს შინა პატიმრობა მიუსაჯა.
უკრაინული ოპოზიციის ლიდერის განცხადებით, "იმპიჩმენტის მარში" პერმანენტულ ხასიათს მიიღებს და ყოველ კვირას უკრაინის სხვადასხვა ქალაქებში გაიმართება.
