მართლმსაჯულება არ უნდა იყოს იმ ადამიანების ხელში, ვინც ახორციელებდა პოლიტიკური ნიშნით დევნას წინა ხელისუფლების დროს, – ამის შესახებ საქართველოს პრეზიდენტმა გიორგი მარგველაშვილმა დღევანდელ ბრიფინგზე განაცხადა, რომელზეც მან საპარლამენტო უმრავლესობის საკანონმდებლო ინიციატივაზე, ე.წ. გირგვლიანის შესწორებებზე ისაუბრა.
პრეზიდენტის თქმით, საკანონმდებლო ცვლილებები, რომელიც აღმოფხვრის სისტემური დანაშაულის შესაძლებლობებს, ყოველთვის იყო მის ინტერესებში.
„მინდა საზოგადოებას შევახსენო, რომ როგორც განათლების მინისტრმა ხელისუფლებაში მოსვლის პირველივე დღიდან ფაქტობრივად, შევქმენი ქმედითი მექანიზმი განათლების სისტემიდან მაშინ პოლიტიკური ნიშნით გათავისუფლებული პედაგოგების სამსახურში დაბრუნების შესახებ. მაშინ შეიქმნა კომისია, რომელმაც არა ერთი საქმე განიხილა. არა ყველა, მაგრამ ძალიან ბევრი პედაგოგი დაუბრუნდა სკოლებს და დღესაც ემსახურება ქვეყანას მიუხედავად იმისა, რომ თავის დროზე ისინი იქნენ გათავისუფლებულნი. საპარლამენტო გამოსვლებისას არა ერთხელ ყურადღება მიმიქცევია იმ საკითხებისთვის, რასაც ჰქვია პოლიტიკური ნიშნით დევნილთა, ან პოლიტპატიმართა საკითხები“, – განაცხადა პრეზიდენტმა.
გიორგი მარგველაშვილის თქმით, დღეს, როცა აღნიშნული მნიშვნელოვანი ცვლილებების განხილვა ხდება, უნდა მოხდეს საუბარი იმ გარანტიებზე, რომელიც მომავალში ადამიანებს დაიცავს ტრაგედიებისგან, რომლის მომსწრენიც გავხდით.
„ეს არ არის წარსულზე ფიქრი, სწორედ მომავალზე ფიქრის თვალსაზრისით, სწორედ პრევენციის თვალსაზრისით, ჩვენ მიგვაჩნია, რომ ის ადამიანები, ვინც ახორციელებდა პოლიტიკური ნიშნით დევნას წინა ხელისუფლების დროს, მათ ხელში არ უნდა იყოს და ვერ განხორციელდება უფრო ეფექტური მართლმსაჯულება, ვერ განხორციელდება რეალური დაცვა და პრევენცია შესაძლო სისტემური პრობლემებისგან. ამიტომ, გირგვლიანის შესწორებების ნაწილში ჩვენ უკვე ვთქვით და კიდევ მინდა დღეს აღვნიშნო, ჩვენ გვაქვს რეალური საკანონმდებლო ამოსავალი, რომელიც არის 2012 წლის 28 დეკემბრის კანონი ამნისტიის შესახებ, რომლითაც პარლამენტმა აღიარა საქართველოში პოლიტიკური ნიშნით დაპატიმრებული და დევნილი ადამიანების არსებობა. სისტემურ დანაშაულში მონაწილე ადამიანების სისტემიდან დათხოვნა ჩვენ სწორედ ამ კანონის მიხედვით ეფექტური მექანიზმის შექმნით უნდა დავიწყოთ, რადგანაც ყველა ის ადამიანი, რომელიც მონაწილეობდა ამ კანონით დადასტურებულ შემთხვევებში, მათ მიმართ უნდა ამუშავდეს ეფექტური მექანიზმი იმისა, რომ ვიყოთ გარანტირებული, რომ ეს დანაშაულები ჩვენი მოქალაქეების მიმართ არასდროს არ განმეორდება. გარდა ამისა, ამ ნაწილში ჩვენ ასევე ვაპირებთ მხარი დავუჭიროთ იმ ადამიანებს, ვისაც უნდა და სურვილი აქვს ამ საქმეების გამოძიების, მათ დავეხმაროთ, რომ უზრუნველყონ და უფრო ეფექტურად განახორციელონ ეს პროცესი. პარლამენტშიც ვთქვი, რომ მზად ვართ, ადვოკატებთან ერთად ვიმუშაოთ იმისთვის, რომ მივცეთ ამ თავიანთი უფლების განხორციელების უფრო ეფექტური შესაძლებლობა“, – განაცხადა გიორგი მარგველაშვილმა.
იანვარში ფრაქცია „ქართული ოცნების“ თავმჯდომარე მამუკა მდინარაძემ განაცხადა, რომ საპარლამენტო უმრავლესობა იწყებს მუშაობას პროექტზე, რომელსაც ე.წ. გირგვლიანის შესწორებები ჰქვია. ამ შემთხვევაშიც საქმე კონკრეტულ დანაშაულებზე პასუხისმგებლობის გამკაცრებას ეხება, რომელიც როგორც მდინარაძე აცხადებს, ერთი მხრივ, უზრუნველყოფს გაცილებით მაღალი სტანდარტით მოქალაქეთა დაცულობას სახელმწიფო ძალმომრეობისგან და მეორე მხრივ, მართლმსაჯულების შეუვალობას.
