Financial Times-ის ინფორმაციით, ევროკავშირი აპირებს წევრობის შესაძლებლობა მისცეს ბალკანეთის 6 ქვეყანას, სერბიას, ჩერნოგორიას, მაკედონიას, ბოსნია და ჰერცეგოვინას, კოსოვოს და ალბანეთს. გამოცემის ცნობით, საუბარია 2025 წლამდე პერიოდზე.
Financial Times-ი ევროკომისიის დოკუმენტზე დაყრდნობით, რომელიც 6 თებერვალს უნდა გამოქვეყნდეს, იტყობინება, რომ ევროკავშირის გაფართოებას ზოგიერთი წევრი სახელმწიფო ეწინააღმდეგება, ამასთანავე, ბრიუსელში მიიჩნევენ, რომ ბალკანეთის ქვეყნების სწრაფად გაწევრიანება მნიშვნელოვანია ევროპულ თანამეგობრობაში მათი ინტერგაციისთვის.
ევროკომისია აპირებს ბალკანეთის ქვეყნებს მოუწოდოს ორმხრივი კონფლიქტების მოგვარებისა და კორუფციასთან ბრძოლისკენ. ევროკავშირი სერბიასა და ჩერნოგორიასთან უკვე აწარმოებს მოლაპარაკებებს წევრობის შესახებ.
გამოცემა წერს, რომ ბრიუსელს სურს ევროკავშირის განახლება, მიგრაციაზე კონტროლის გაძლიერება და წინააღმდეგობის გაწევა ბალკანეთზე რუსეთის გავლენის გაძლიერებისთვის.
