აშშ-ისა და ისრაელისგან გაფრთხილების მიუხედავად, პოლონეთის სენატმა მხარი დაუჭირა სადავო კანონპროექტს, რომელიც დასჯად ქმედებად აცხადებს იმის მტკიცებას, რომ ჰოლოკოსტში პოლონელებიც მონაწილეობდნენ.
კერძოდ, ჯარიმით, ან სამ წლამდე პატიმრობით დაისჯება ყველა, ვინც გერმანელი ნაცისტების საკონცენტრაციო ბანაკებს უწოდებს „პოლონურ სიკვდილის ბანაკებს,“ ან პოლონეთს ბრალად დასდებს ნაცისტების მიერ ჩადენილ დანაშაულში მონაწილეობას. ძალაში შესვლამდე, დღეს მიღებულ კანონპროექტს პოლონეთის პრეზიდენტმა უნდა მოაწეროს ხელი.
მანამდე, აშშ-მა და ისრაელმა პოლონეთს მოუწოდეს უარი ეთქვა ამ კანონის მიღებაზე. სახელმწიფო დეპარტამენტის ოფიციალური წარმომადგენლის ჰიზერ ნოიერტის განცხადებით, საჭიროა სიფრთხილე, რათა ჰოლოკოსტზე მსჯელობას ხელი არ შეეშალოს.
აშშ-ის პოზიციაა, რომ კანონპროექტის მიღებამ შესაძლოა, ეჭვქვეშ დააყენოს სტრატეგიული ინტერესები და პოლონეთის ურთიერთობები აშშ-თან და ისრაელთან. პოლონეთის გადაწყვეტილებას დაუსაბუთებელი უწოდა ისრაელის პრემიერ-მინისტრმა. 27 იანვარს ნეთანიაჰუმ განაცხადა, რომ არ შეიძლება ისტორიის შეცვლა და ჰოლოკოსტის უარყოფა.
