თბილისის საკრებულოს ფრაქცია „ნაციონალური მოძრაობა“ სატრანსპორტო საკითხებზე საკრებულოს რიგგარეშე სხდომის დანიშვნას ითხოვს, - ამის შესახებ ფრაქციის თავმჯდომარე ირაკლი ნადირაძემ განაცხადა.
როგორც თბილისის საკრებულოში დღეს გამართულ ბრიფინგზე მდინარაძემ განაცხადა, მათ აქვთ კითხვები და სისხლისსამართლებრივ პასუხისმგებლობასთან ერთად, დამნაშავე პირთა პოლიტიკური პასუხისმგებლობის საკითხის დაყენებასაც ითხოვენ.
„გუშინ ჩვენი ქვეყანა და თბილისი გადარჩა ძალიან დიდ ტრაგედიას და ეს იყო „ქართული ოცნების“ არაკომპეტენტური, არაკვალიფიციური და კორუმპირებული, მავნებლური მმართველობის შედეგი. ჩვენი აზრით, აქ არ უნდა დადგეს მხოლოდ ცალკეული ადამიანების პასუხისმგებლობის საკითხი. აქ უნდა დადგეს „ქართული ოცნების“ გუნდის პასუხისმგებლობის საკითხი. შესაბამისად, ჩვენ ვფიქრობთ, რომ მხოლოდ ფრაქციულ ფორმატში კონკრეტული სამსახურის უფროსის მოწვევა არ არის საკმარისი. ამიტომ, ჩვენ მივმართავთ საკრებულოს თავმჯდომარეს, რომ მოიწვიოს საკრებულოს რიგგარეშე სხდომა, რომელსაც დაესწრებიან თბილისში, საზოგადოებრივი ტრანსპორტის გამართულობაზე პასუხისმგებელი პირები და ისინი მოგვცემენ კონკრეტულ კითხვებზე კონკრეტულ პასუხებს. თბილისელებს აქვთ უფლება იცოდნენ, რა ხდება საზოგადოებრივ ტრანსპორტში და თბილისის მეტროპოლიტენში რამდენად უსაფრთხოა გადაადგილება. შესაბამისად, ჩვენ იმედი გვაქვს, რომ საკრებულოს უმრავლესობა რიგგარეშე სხდომის მოწვევაზე არ იტყვის უარს“, - აღნიშნა ირაკლი ნადირაძემ.
