საქართველოს პრემიერმინისტრი ლიტველ კოლეგას მასპინძლობს. საულიუს სკვერნელისს მთავრობის ადმინისტაციაში ოფიციალური დახვედრა მოუწყვეს.
ამ წუთებში კი გიორგი კვირიკაშვილსა და საულიუს სკვერნელისს შორის პირისპირ შეხვედრა მიმდინარეობს, მოგვიანებით კი გაფართოებული აუდიენცია გაიმართება.
შეხვედრების დასრულების შემდეგ ორი ქვეყნის პრემიერმინისტრები ერთობლივ პრესკონფერენცია გამართავენ.
ოფიციალური ვიზიტის ფარგლებში, დაგეგმილია ლიტვის პრემიერის შეხვედრები საქართველოს პრეზიდენტსა და პარლამენტის თავმჯდომარესთან.
30 იანვარს ლიტვის პრემიერ-მინისტრი საოკუპაციო ხაზთან მდებარე სოფელ ოძისში გაემგზავრება, ასევე - ეწვევა დროებით იძულებით გადაადგილებულ პირთა დასახლებას ფრეზეთში.
ოფიციალური ვიზიტის ფარგლებში, ლიტვის პრემიერ-მინისტრი გვირგვინით შეამკობს საქართველოს ერთიანობისთვის დაღუპულ გმირთა მემორიალს. საულიუს სკვერნელისის ვიზიტის პროგრამა კულტურულ ნაწილსაც მოიცავს. ლიტვის პრემიერი საქართველოში სტუმრობისას ძველ თბილისსა და მცხეთის ღირსშესანიშნაობებს დაათვალიერებს.
