კიევის სააპელაციო სასამართლოში მიხეილ სააკაშვილის აღკვეთის ღონისძიებასთან დაკავშირებით უკრაინის გენერალური პროკურატურის საჩივრის განხილვა კიდევ ერთხელ გადაიდო. პროცესის გადადების მიზეზი კოლეგიის ერთ-ერთი წევრის გამოუცხადებლობა გახდა. განხილვა 26 იანვრისთვის არის გადატანილი. მანამდე სასამართლოს სხდომა ორჯერ გადაიდო, რადგანაც პროცესზე არ გამოცხადდნენ დეპუტატები, რომლებიც სააკაშვილს პირველი ინსტანციის სასამართლოზე თავდებში ჩაუდგნენ. 11 დეკემბერს პირველი ინსტანციის სასამართლომ გენერალური პროკურატურის მოთხოვნა არ დააკმაყოფილა და სააკაშვილი დარბაზიდან გაათავისუფლა. გენერალურმა პროკურატურამ რაიონული სასამართლოს გადაწყვეტილება გაასაჩივრა.
