„ერთიანი ნაციონალური მოძრაობის“ წევრები საქართველოს ყოფილი პრეზიდენტის, მიხეილ სააკაშვილის საქმესთან დაკავშირებით სახალხო დამცველს შეხვდნენ. შეხვედრის ძირითადი თემა სააკაშვილის წინააღმდეგ გამოტანილი განაჩენი იყო.
შეხვედრაზე, ასევე, ვანო მერაბიშვილის, გოგა ონიანისა და მერაბ ჩხვირკიას საქმეებზე ისაუბრეს.
როგორც პარტიის წევრმა, ზაზა ბიბილაშვილმა შეხვედრის დასრულების შემდეგ განაცხადა, სახალხო დამცველი პოლიტიკურ განცხადებებს ვერ გააკეთებს, მაგრამ პირობა მისცათ, რომ ყველა საქმეს შეისწავლის და ადეკვატურ სამართლებრივ შეფასებას გააკეთებს საჯაროდ.
„სახალხო დამცველს ვესაუბრეთ იმ პოლიტიკურ ვითარებაზე, რომელიც ჩვენს ქვეყანაშია. ასევე ვესაუბრეთ ძალიან კონკრეტულ პრობლემებზე, ოპოზიციის პოლიტიკურ დევნასა და რეპრესიებზე. გადავეცით ყველა ის მასალა, რომელიც ამ ეტაპზე ჩვენს ხელთ არის. ეს არაა ბრძოლა, რომელშიც „ნაციონალური მოძრაობაა“, ეს არაა ბრძოლა, რომელშიც რომელიმე ერთი კონკრეტული პარტიაა, ეს არის საქართველოს ყველა კანონმორჩილი მოქალაქის ბრძოლა იმისთვის, რომ ამ ქვეყანაში არსებობდეს სასამართლო, რომ ამ ქვეყანაშიც არსებობდეს მომავლის განცდა და მომავლის იმედი კანონმორჩილი მოქალაქეებისთვის, ანუ საქართველოში დასრულდეს ივანიშვილის კლანური და კორუმპირებული მმართველობა“, - განაცხადა ზაზა ბიბილაშვილმა.
შეგახსენებთ, მოსამართლე გიორგი არევაძემ სანდრო გირგვლიანის საქმეზე მიხეილ სააკაშვილი დამნაშავედ ცნო. სასჯელის სახით სასამართლომ სააკაშვილს 4 წლით თავისუფლების აღკვეთა მიუსაჯა.
