ეთნიკური საბავშვო ბაღების პედაგოგ-აღმზრდელებისთვის სახელმწიფო და მშობლიური ენის ცოდნის სტანდარტების დანერგვა 2018 წლიდან დაიწყება, - ამის შესახებ საქართველოს განათლებისა და მეცნიერების მინისტრის მოადგილემ, ლია გიგაურმა განაცხადა.
როგორც გიგაურმა პარლამენტში, ადრეული და სკოლამდელი აღზრდისა და განათლების კანონის იმპლემენტაციაზე გამართული სამუშაო შეხვედრის შემდეგ ჟურნალისტებს განუცხადა, განათლების სამინისტროსთვის განსაზღვრული იყო ორი მნიშვნელოვანი ვალდებულება, სტანდარტების შემუშავება, როგორც პედაგოგ-აღმზრდელის პროფესიული სტანდარტის მიმართულებით, ასევე საგანმანათლებლო სტანდარტების მიმართულებით. მისივე განცხადებით, გადამუშავებისა და ფოკუს ჯგუფებთან შეხვედრის პროცესში გამოიკვეთა მცირე გამოწვევები, კერძოდ, ეთნიკური საბავშვო ბაღებისთვის, პედაგოგ-აღმზრდელის დამატებითი უნარების მოთხოვნა, ეს არის ორი ენის ფლობა, სახელმწიფო და მშობლიური ენის ფლობა.
"განათლების სამინისტროსთვის განსაზღვრული იყო ორი მნიშვნელოვანი ვალდებულება, სტანდარტებია შემუშავება, როგორც პედაგოგ-აღმზრდელის პროფესიული სტანდარტის მიმართულებით, ასევე საგანმანათლებლო სტანდარტების მიმართულებით. ორივე ვალდებულება შესრულებულია. დოკუმენტები მზად არის დანერგვისთვის, მაგრამ გადამუშავებისა და ფოკუს ჯგუფებთან შეხვედრის პროცესში გამოიკვეთა მცირე გამოწვევები, კერძოდ, ეთნიკური საბავშვო ბაღებისთვის, პედაგოგ-აღმზრდელის დამატებითი უნარების მოთხოვნა, ეს არის ორი ენის ფლობა, სახელმწიფო და მშობლიური ენის ფლობა. ჩვენ ამ ნაწილში სტანდარტებს გავაძლიერებთ. ასევე ძალიან დიდი მნიშვნელობა აქვს ისეთ მცირე კონტიგენტიან სოფლებში, სადაც საბავშვო ბაღები ვერ დაკომპლექტდება იმ წესით როგორც კანონით არის განსაზღვრული, შემუშავებული იქნას გარკვეული კომპლექტური ჯგუფების სტანდარტები და პრინციპები, რომელზეც ჩვენ მუშაობას დავიწყებთ და ამ მიმართულებით კომისიისგან მივიღეთ თანხმობა", - განაცხადა ლია გიგაურმა.
